ئه‌م تابلۆیه ته‌نها نمونه‌یه‌كه بۆ سودلێوه‌رگرتن‌و دایه‌نگه‌یه‌ك به‌و ناوه‌وه نییه.
به پێی بڕگه‌ی (9) له كۆنووسی ژماره (1)ی كۆبوونه‌وه‌ی ڕۆژیانى 30و 31ی 10ی 2016ی دایه‌نگه‌كان، پێویسته دایه‌نگه‌كان تابلۆكانیان به‌جۆرێك بگۆرن كه ئاماژه‌ی تیا بێت بۆ (حكومه‌تی هه‌رێمی كوردستان / وه‌زاره‌تی كارو كاروباری كۆمه‌ڵایه‌تی/ به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی/ به‌شی دایه‌نگه‌كان).
ئێمه له ڕاگه‌یاندنی به‌ڕێوه‌به‌رایه‌تی گشتی، بۆ به‌رچاوڕوونی زیاتری دایه‌نگه‌كان، ئه‌م نمونه‌یه‌مان بۆ پێشنیاركردوون بۆ ئه‌وه‌ی دایه‌نگه‌كان ئاگاداری ئه‌و زانیارییان بن كه پێویسته له تابلۆكانیاندا هه‌بێت.
له‌باره‌ی دیزاین‌و ڕه‌نگ‌و گه‌وره‌یی‌‌و بچوكی قه‌باره‌ی نووسینه‌كانه‌وه، دایه‌نگه ناحكومییه‌كان سه‌رپشكن له‌وه‌ی چ جۆره دیزاینێك هه‌ڵده‌بژێرن، به‌ڵام پێویسته نووسینه‌كان هه‌ر ئه‌و نووسینانه بن كه له ئه‌م تابلۆ نمونه‌ییه‌دا هه‌یه، هه‌روه‌ها به‌جۆرێك بن بخوێنرێنه‌وه به ئاسانی.
سه‌باره‌ت به ناوی به‌كارهاتووش بۆ دایه‌نگه، پێویسته دایه‌نگه‌كان وشه‌ی (ناحكومی) به‌كاربهێنن‌و خۆیان له هه‌ر وشه‌یه‌كی "نمونه‌یی، تایبه‌ت، ئه‌هلی، .... " بپارێزن‌و به‌كاریان نه‌هێنن، چونكه ڕێگه پێدراو نین.
جێی ئاماژه‌یه له ڕۆژانی 30و 31ی 10ی 2016، به سه‌رپه‌رشتی به‌ڕێز به‌ڕێوه‌به‌ری گشتی، كۆبوونه‌وه‌یه‌كی هاوبه‌ش له‌نێوان به‌شی دایه‌نگه‌كان‌و به‌ڕێوه‌به‌ری دایه‌نگه‌كاندا به‌ڕێوه‌چوو، ئه‌نجامی كۆبوونه‌وه‌كه كۆنووسێكی(11) خاڵی بوو كه پێویست ده‌كات دایه‌نگه‌كان پێوه‌ی پابه‌ند بن، كۆتا به‌رواریش بۆ ئه‌و دایه‌نگانه‌ی تا ئێستا وه‌ك‌و پێویست خۆیان له‌گه‌ڵ ناوه‌ڕۆكی ڕێنماییه‌كان‌و سیستمی دایه‌نگه‌دا نه‌گونجاندووه بریتییه له 1ی 1ی 2017، له‌دوای ئه‌و به‌رواره‌وه دایه‌نگه‌كان به‌رپرسیارن به‌رانبه‌ر ئه‌و ورده‌كارییانه‌ی له‌پێناو به‌رژه‌وه‌ندی گشتیدا لێیان داواكراوه.