بەیانی ئەمڕۆ 4ـی تشرینی دووەمی2022، پاش ئەوەی هاوڵاتیەکی چاکەکار زانیاری گەیاندە بەڕێوەبەرایەتی گشتی لەسەر هاوڵاتیەکی بەساڵاچوو کە لەسەر شەقامەکانی ناو شاری سلێمانی لە بارودۆخێکی خراپدا ژیان بەڕێدەکات هەرزوو بەڕێز م. ئیسماعیل ڕەشید ، بەڕێوەبەری گشتی چاودێری و گەشەپێدانی کۆمەڵایەتی لەپارێزگای سلێمانی گەیشتە شوێنی مانەوەی بەساڵاچوەکەو پاش بەدواداچون، بەڕێز خاتوو بەناز کەریم ، بەرپرسی ماڵی بەساڵاچوانی بە گواستنەوەی بۆ ماڵی بەساڵاچوان ڕاسپارد.

تیمێکی ماڵی بەساڵاچوان پاش ئەوەی هاوڵاتیەکە دەگەیەننە نەخۆشخانەو چارەسەری پێویستی بۆ دەکرێت دەگوازرێتەوە بۆ ماڵی بەساڵاچوان و لە ئێستادا هاوڵاتیەکە لە بارودۆخێکی باش دایە و لە شوێنێکی‌ شایستە بە خۆی و مافەکانی‌ پارێزراون.

بۆ ئەومەبەستە بەڕێز بەڕێوەبەری گشتی ڕایگەیاند " هەرچی پێویست بێت بۆ ئەو بەساڵاچووە کراوە و دەستخۆشی لەبەڕێوەبەرو کارمەندانی ماڵی بەساڵاچوان دەکەم کە هەموو کات ئامادەن بۆ بەهاناوەچونی بەساڵاچوانی سەرشەقام و بێلانەکان هەروەها ئەو تیمەی کە بەدەم ئەو بەساڵاچوەوە چون .
پاشان ووتی ماڵی‌ بەساڵاچووانی‌ سلێمانی‌، بەشێوەی‌ بیست‌و چوار کاتژمێری، دەرگای‌ کراوەیە بۆ لە ئامێزگرتنی‌ ئەو بەساڵاچووانەی‌ کە بەهەر هۆکارێک پێویستیان بەو شوێنە شایستەیە هەیە و خزمەتگوزاری‌ کۆمەڵایەتی‌‌و دەروونی‌‌و تەندروستی‌‌و پێویستی‌ ڕۆژانەی‌ ژیانیان پێشکەش دەکات".