له‌كۆبوونه‌وه‌یه‌كی تایبه‌تی خۆیدا، ڕێكخراوی نه‌ته‌وه یه‌كگرتووه‌كان، به ئاماده‌بوونی بان كی مۆنی سه‌رۆكی ڕێكخراوه‌كه، كچه كوردی ئێزیدی، نادیه مورادی وه‌ك باڵیۆزی نیازپاكی له عێراق ده‌ستنیشان كرد.
له‌و باره‌یه‌وه، عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی، ڕووداوی دیاریكردنی كچه كوردێكی ئێزیدی به ڕووداوێكی گرنگ زانی بۆ كوردو هه‌رێمی كوردستان‌و ئاینزای ئێزیدی.
له پۆستێكیدا له په‌یجی تایبه‌تی خۆی له تۆڕی كۆمه‌ڵایه‌تی فه‌یس بووك، عومه‌ر گوڵپی، نووسیویه‌تی : " ڕووداوی دیاریكردنی كچه كوردێكی ئێزیدی(نادیه موراد) له پۆستێكی دیپلۆماسیدا به‌ناونیشانی (باڵیۆزی نیازپاكی) له‌لایه‌ن نه‌ته‌وه یه‌كگرتووه‌كانه‌وه، ئه‌گه‌رچی پۆستێكی مرۆیی‌‌و شكڵی بێت، به‌ڵام ڕووداوێكی گرنگه بۆ هه‌رێمی كوردستان، ده‌كرێت سه‌ره‌ڕای سودلێوه‌رگرتنی له‌لایه‌ن ئاینزای ئێزیدیه‌وه له هه‌رێمی كوردستان، كوردیش وه‌ك نه‌ته‌وه سودی لێوه‌ربگرێت".
ڕۆژی شه‌ممه، 17ی 9ی 2016، ڕێكخراوی نه‌ته‌وه یه‌كگرتووه‌كان كچه كوردی ئێزیدی ته‌مه‌ن 23 ساڵی وه‌ك باڵیۆزی نیازپاكی بۆ عێراق ده‌ستنیشانكرد، شایانی باسه ئه‌وه بۆ یه‌كه‌مجاره هاووڵاتیه‌كی هه‌رێمی كوردستان پۆستێك له‌نێو پێگه‌یه‌كی نێوده‌وڵه‌تیدا وه‌ربگرێت.
نادیه موراد، ساڵی 1993 له گوندی كۆجۆی شه‌نگار له دایكبووه ، یه‌كێك له قوربانیانی تاوانه‌كانی ڕێكخراوی تیرۆریستی داعشه‌و كه‌س‌و كاره‌كه‌شی له‌لایه‌ن هه‌مان ڕێكخراوه‌وه ڕووبه‌ڕووی جینۆساید بوونه‌ته‌وه‌‌و پاڵێوراوی خه‌ڵاتی نۆبڵی ئاشتییه.