وەزیری کار و کاروباری کۆمەڵایەتی پێشوازی له شاندێکی ڕێکخراوی (IFMASA) ده‌كات .
٫٫وەزیری کارو کاروباری کۆمەڵایەتی : گرنگی دان بە منداڵانی ماڵەکانی نەوجەوانان گرنگەو پەروەردە کردنیان و ئامادە کردنیان بۆ ناو کۆمەڵگا لە ئەستۆی ئێمەیە،،
ئەمڕۆ شەممە ، ٢ـی نیســــانی ٢٠٢٢ ، خاتوو کوێستان محمەد وەزیری کار و کارو باری کۆمەڵایەتی ، بە ئامادە بوونی بەڕێزان، م. ئیسماعیل ڕەشید، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی، خاتوو ژیار جەلال ، بەڕێوەبەری چاودێری کۆمەڵایەتی سلێمانی، هیوا سەعید ، سەرپەرشتیاری پەروەردەیی، پێشوازیكرد له شاندێکی ڕێکخراوی (IFMSA) کە پێک هاتبوون لە بەڕێزان ، ڕەوا قوربانی بەڕێوەبەری گروپ و خۆبەخشانی گروپەکە.
ئامانجی سه‌ردانه‌كه بریتی بوو له دانانی بەرنامەیەکی تۆکمە بۆ چارەسەر کردنی گیروگرفتە کانی ماڵەکانی منداڵان و کوڕان و کچان، هه‌روه‌ها وه‌رگرتنی پێشنیاری ڕێکخراوی (IFMSA) بۆ خزمه‌تكردنی زیاتری منداڵان‌و کوڕان و کچان له سنوری پارێزگای سلێمانی‌‌و گرنگیدان بە لایەنی پەروەردەیی و تەندروستیان.
پاشان بەڕێز وەزیری کارو کاروباری کۆمەڵایەتی لە کۆبونەوەکەدا جەختی کردەوە گرنگی زیاتر بە بواری پەروەردە و فێرکردنی منداڵانی ماڵەکان بدرێت تا نەوەیەکی باش و بەسود بۆ کۆمەڵگا دروست بکرێت و بەڕێوەبەرایەتی چاودێری کۆمەڵایەتی ڕاسپارد بە سەرپەرشتی بەڕێز بەڕێوەبەری گشتی ڕاپۆرتێکی تێرو تەسەل لەسەر گیرو گرفتەکانی منداڵانی ماڵەکانی چاودێری کۆمەڵایەتی ئامادە بکەن تا بەزوترین کات چارەسەری پێویستیان بۆ ئەنجام بدەین.
|