ئەمڕۆ ٥ـی ئادارـی ٢٠٢٢ ، بەڕێز م .ئیسماعیل ڕەشید محەمەد ، بەڕێوەبەری گشتی چاودێری و گەشەپێدانی کۆمەڵایەتی لە پارێزگای سلێمانی،بە بۆنەی یادە مەزنەکەی ڕاپەڕینەوە پەیامێکی بڵاو کردەوە ئەمەی خوارەوە دەقەکەیەتی.
ــــــــــــــــــــــــــــــــــــــــــــــــــــــــــــــــــــــــــــــــــــ

٫٫پابەند دەبین بە ئامانجەکانی ڕاپەڕین و تەواوی هەوڵی خۆمان بۆ پشتگیری و خزمەت کردنی کەمئەندام و منداڵان و هەژاران وگشت چین و توێژەکانی دامەزراوەی کۆمەڵایەتی دەبێت،،

بەڕێزان ، هاوڵاتیانی خۆشەویست، بەبۆنەی سی و یەکەمین ساڵیادی ڕاپەڕینی جەماوەری کوردستان ، بە ناوی بەڕێوەبەرایەتی گشتی چاودێری و گەشەپێدانی کۆمەڵایەتی لە پارێزگای سلێمانی،گەرمترین پیرۆزبایی لە کەسوکاری سەربەرزی شەھیدان و ھاوڵاتیانی گەلی کوردستان و بە تایبەت پارێزگای سلێمانی دەکەین، ھیوادارین ئەم یادە ببێتە ھەوێنی یەکڕیزی و تەبایی گەلەکەمان و کۆتایی ھێنان بەتەواوی نەھامەتی و ناخۆشیەکانی گەلەکەمان و ئاوڕدانەوەی زیاتر لە کەسوکاری سەربەرزی شەھیدان و کەمئەندامان ، گشت چین و توێژەکانی کۆمەڵگە بێ جیاوازی هەروەها ببێتە مایەی پاراستنی دەستكەوتەكانی ڕاپەرین.

بەڕێزان ،ڕاپەڕین هەڵگری وانەی گەورە بوو. لە ڕاپەڕیندا گەلی کوردستان نموونەی بەرزی ڕەوشت و فەرهەنگی ئاشتی بە گوێی جیهاندا. ڕاپەڕین وەڵامێكی گونجاوی گەلی كورد بوو دژ بە زوڵم وستەمكاری بەعسیەكان،بۆیە خەڵكی كوردستان پشت ئەستور بە ئیرادەی خۆیان و پێشمەرگە قارەمانەكان،ڕاپەڕینی سەرتاسەریان دەست پێكرد. بۆ گەشتن بە مافەکانی خۆی.

ئێمە لە بەڕێوەبەرایەتی گشتی دوپاتی دەکەینەوە کە پابەند دەبین بە ئامانجەکانی ڕاپەڕین و تەواوی هەوڵی خۆمان بۆ پشتگیری و خزمەت کردنی کەمئەندام و منداڵان و هەژاران وگشت چین و توێژەکانی دامەزراوەی کۆمەڵایەتی دەبێت و بەڕێز و شکۆوە یادی ڕاپەڕین دەکەینەوە.

ئیسماعیل ڕەشید محەمەد
بەڕێوەبەری گشتی چاودێری و گەشەپێدانی کۆمەڵایەتی سلێمانی.
٥ـی ئادارـی ٢٠٢٢