ڕوونكردنه‌وه‌یه‌ك له‌باره‌ی ئه‌و 62 هاووڵاتیه خاوه‌ن پێداویستی تایبه‌ته‌ی مووچه‌كانیان ڕاگیراوه
ڕوونكردنه‌وه‌یه‌ك له‌باره‌ی ئه‌و 62 هاووڵاتیه خاوه‌ن پێداویستی تایبه‌ته‌ی مووچه‌كانیان ڕاگیراوه
له‌لایه‌ن وه‌زاره‌تی داراییه‌وه داواكرابوو زانیارییه پێویسته‌كانی (62) هاووڵاتی خاوه‌ن پێداویستی تایبه‌ت كه له تۆڕی پاراستنی كۆمه‌ڵایه‌تی سلێمانی هاوكاری وه‌رده‌گرن له‌لایه‌ن وه‌زاره‌تی كاروكاروباری كۆمه‌ڵایه‌تییه‌وه بنێردێن بۆ وردبینیكردن، به‌ڵام له‌به‌رئه‌وه‌ی له ساڵانی ڕابردوودا ئه‌و زانیارییانه وه‌ك پێویست له‌لایه‌ن به‌ڕێوه‌به‌رێتییه‌كانه‌وه وه‌رنه‌گیراوه، ته‌نها ئه‌و زانیارییانه‌ی له دۆسییه‌كانیاندا هه‌بوون نێردران بۆ وه‌زاره‌تی كارو له‌وێشه‌وه بۆ وه‌زاره‌تی دارایی كه له ئاستی پێویستدا نه‌بوون، هه‌ربۆیه ئه‌و 62 هاووڵاتیه مووچه‌ی مانگی سێیان كه له ڕۆژی یه‌كشه‌ممه 28ی 8ی 2016 دابه‌شكرا، ڕاگیراوه تا زانیارییه‌كان ده‌گه‌یه‌ننه تۆڕی پاراستنی كۆمه‌ڵایه‌تی سلێمانی، پاشان مووچه‌كانیان وه‌ك‌و خۆی به‌رده‌وام ده‌بێت، له ئێسته‌شدا 22 هاووڵاتیان په‌یوه‌ندییان كردووه‌‌و زانیارییه‌كانیان هێناوه‌‌و له‌كاتی گه‌یشتنی زانیارییه‌كانی 62 هاووڵاتیه‌كه به هه‌ردوو وه‌زاره‌تی كارو دارایی ئاگادارده‌كرێنه‌وه سه‌ردانی بانك بكه‌ن‌و مووچه‌كانیان وه‌رگرن.
بۆیه هاووڵاتیانی به‌ڕێزی خاوه‌ن پێداویستی تایبه‌ت دڵنیا ده‌كه‌ینه‌وه كه ئه‌م ڕێكاره هیچ په‌یوه‌ندی به دووباره پشكنینه‌وه‌وه نییه‌‌و ته‌نها په‌یوه‌ندی به‌و 62 ناوه‌وه هه‌یه كه له‌لایه‌ن وه‌زاره‌تی داراییه‌وه داوای زانیارییه‌كانیان كراوه بۆ وردبینی، پرۆسه‌ی دووباره پشكنینه‌وه هه‌تا به كۆتا نه‌گات‌و ئه‌نجامه‌كانی ڕانه‌گه‌یه‌نرێن هه‌ر كار به داتاكانی ئێسته ده‌كرێن‌و هه‌ر مووچه‌یه‌ك بدرێت یان ڕابگیرێت له‌سه‌ر بنه‌مای ئه‌و لیستانه‌یه كه له پێش 2013 ه‌وه كاریان پێده‌كرێت‌و به‌ڕێوه‌به‌رایه‌تی گشتیمان‌و وه‌زاره‌تی كارو كاروباری كۆمه‌ڵایه‌تی له‌م ڕووه‌وه دڵنیایی ده‌داته هاووڵاتیانی خاوه‌ن پێداویستی تایبه‌ت.
ڕاگه‌یاندنی به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی
1ی 9ی 2016
|