دایه‌نگه‌ی گه‌شه‌ی تایبه‌ت كۆتایی به ڕاهێنانێكی تایبه‌ت به سایكۆلیۆجیای منداڵ هێنا
دایه‌نگه‌ی گه‌شه‌ی تایبه‌ت كۆتایی به ڕاهێنانێك هێنا كه تیایدا داده‌و توێژه‌رو مامۆستاكانی به سایكۆلۆجیاو پره‌نسیپه‌كانی گه‌شه‌ی منداڵ ئاشنابوون.
ڕۆژی شه‌ممه، 27ی 8ی 2016، به ئاماده‌بوونی عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی، دایه‌نگه‌ی گه‌شه‌ی تایبه‌ت كۆتایی به خولێك هێنا كه تیایدا بۆ ماوه‌ی 12 كاتژمێری تیۆری‌‌و چوار كاتژمێری كرداریی، به‌ڕێوه‌به‌رو توێژه‌رو داده‌ی دایه‌نگه‌كه ڕاهێنانیان وه‌رگرت له‌باره‌ی سایكۆلۆجیاو پره‌نسیپه‌كانی گه‌شه‌ی منداڵ كه له‌لایه‌ن پرۆفیسۆر د.كه‌ریم شه‌یف قه‌ره‌چه‌تانی، پسپۆرو شاره‌زا له‌بواری په‌روه‌رده‌و گه‌شه‌ی منداڵ وترایه‌وه.
له وته‌یه‌كیدا، به‌ڕێوه‌به‌ری گشتی ده‌ستخۆشی له دایه‌نگه‌ی گه‌شه‌ی تایبه‌ت كرد كه له‌پێناو گه‌شه‌پێدانی توانای داده‌و كارمه‌ندو په‌روه‌رده‌كاره‌كانیدا خول‌و ڕاهێنانی تایبه‌ت ئه‌نجام ده‌دات‌و هه‌وڵده‌دات ئاستی دایه‌نگه‌كه‌ی باشتر به‌رزبكاته‌وه، هه‌روه‌ها بایه‌خی دایه‌نگه‌و گه‌شه‌كردنی هه‌مه‌لایه‌نه‌ی تواناكانی دایه‌نگه تایبه‌ته‌كانی به گرنگییه‌وه باسكردو له‌و باره‌یه‌وه به پێویستی زانی سه‌رجه‌م دایه‌نگه‌كان به بایه‌خه‌وه له ڕۆڵی ڕاهێنان بڕوانن له گواستتنه‌وه‌ی زانیاریی‌و توانایی‌و ئاراسته‌كانی بیركردنه‌وه، له‌و بابه‌تانه‌ی په‌یوه‌ندییان به په‌روه‌رده‌و به‌خێوكردنی منداڵ‌و ژیانی نێو دایه‌نگه‌وه هه‌یه، هه‌روه‌ك له به‌شێكی قسه‌كانیدا ده‌ستخۆشی له د.كه‌ریم شه‌ریف قه‌ره‌چه‌تانی كرد كه رۆڵی له‌و بواره‌دا دیارو به‌رچاوه، هه‌روه‌ها سوپاس‌و ده‌ستخۆشی ئاراسته‌ی ستافی دایه‌نگه كردو هیوای خواست ئه‌و دادانه‌ی به‌شداری ڕاهێنانه‌كه‌بوون بابه‌ته‌كانی خول‌و ڕاهێنانه‌كه له ژیانی ڕۆژانه‌یاندا بۆ خزمه‌تكردنی باشترو زیاتری منداڵ ڕه‌نگبداته‌وه .
له كۆتایی مه‌راسیمه‌كه‌شدا بڕوانامه‌ی ده‌رچوون به‌سه‌ر به‌شداربوواندا دابه‌شكرا .
|