ده‌روون عومه‌ر: دوو منداڵه‌كه‌ی گه‌رمیان‌و باوكیان له ئێسته‌وه پارێزراون
پاش بڵاوبوونه‌وه‌ی هه‌واڵی ژیانی كوله‌مه‌رگی خێزانێكی گه‌رمیانی، كه له دایكێك‌و باوكێك‌و دوو منداڵ پێكهاتبوو، هاووڵاتیان‌و چاكه‌خوازان‌و دامه‌زراوه په‌یوه‌ندیداره‌كان به هانایانه‌وه چوون‌و گه‌یه‌نرانه نه‌خۆشخانه له‌شاری سلێمانی، به‌ڵام ئه‌و خێزانه ئاماده‌نه‌بوون له نه‌خۆشخانه بمێننه‌وه‌و منداڵه‌كانیشیان ببه‌خشنه خانه‌كانی نه‌وجه‌وانان به‌هۆی كێشه‌ی ده‌روونیه‌وه، پاش گه‌ڕانه‌وه‌شیان، له ژێر كاریگه‌ریی نه‌خۆشییه‌كه‌یدا دایكی منداڵه‌كان گیانی له ده‌ستدا.
ئه‌مڕۆ سێشه‌ممه، 23ی8ی2016، ئه‌و منداڵانه‌‌و باوكیان به هه‌وڵی ژماره‌یه‌ك لایه‌نی جیاواز گه‌یه‌نرانه شوێنی شیاوو منداڵه‌كان له خانه‌ی نه‌وجه‌وانان‌و باوكیشیان له خانه‌ی به‌ساڵاچووان جێگیركران.
له‌وباره‌یه‌وه، ده‌روون عومه‌ر، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی گه‌رمیان، له ئه‌كاونتی تایبه‌تی خۆی له تۆڕی كۆمه‌ڵایه‌تی فه‌یس بووك ڕایگه‌یاند :" ئەمڕۆ لە پاش وەرگرتنی بڕیاری بەڕێز داواکاری گشتیی گەرمیان، بە فەرمانی ئێمە و لە ڕێگەی تیمێکی توێژەران‌و چاودێری خێزانی سەر بە بەڕێوەبەرایەتی گشتیمانەوە، موحه‌ممه‌د‌و ئه‌حمه‌د، گەیەنرانە خانەی بێ نه‌وجه‌وانانی سلێمانی و کاک مه‌حمودی باوکیشیان لە خانەی بەساڵاچوانی سلێمانی جێگەی بۆ دابینکرا..." هه‌ر له پۆسته‌كه‌یدا، ده‌روون عومه‌ر سوپاسی ئه‌م كه‌سانه ده‌كات كه هاوكاریان بوون له‌‌و ئه‌ركه پیرۆزه‌دا :" لێرەوە بە پێویستی ئەزانم سوپاسی هەریەک لەم بەڕێزانە بکەم: م.عمر گوڵپی ـ به‌ڕێوه‌به‌ری گشتی چاودێری و گەشەپێدانی کۆمەڵایەتی سلێمانی و سەرنج خان به‌ڕێوه‌به‌ری كۆمه‌ڵایه‌تی سلێمانی‌‌و کاک شه‌هاب حاجی ئه‌حمه‌د، قائمقامی کەلار‌و کاک ئاسۆ هاشم و کاک محمد حمە ساڵح‌و دییە خان و کاک وریای ڕێکخراوەکان و چنورخان‌و هێندێك چاكه‌خوزای تر كه به‌ده‌م مافی ئه‌و خێزانه‌وه بوون ".
|