به‌مه‌به‌ستی هه‌ڵسه‌نگاندنی كاری شه‌ش مانگی ڕابردوو، هه‌روه‌ها دانانی پلان‌و كاری به‌رنامه‌ی داهاتوو، بۆردی سه‌رپه‌رشتیاری پڕۆژه‌ی خێزانی جێگره‌وه كۆبوونه‌وه‌ی خۆی له شاری سلێمانی گرێدا.
ڕۆژی دووشه‌ممه، 22ی8ی2016، له هۆڵی كتێبخانه‌ی كۆمه‌ڵگه‌ی چاودێریی كۆمه‌ڵایه‌تی سلێمانی‌‌و به ئاماده‌بوونی عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له‌پارێزگای سلێمانی‌‌و نه‌جاح خه‌لیل، سه‌رۆكی بۆردی پرۆژه‌ی خێزانی جێگرهوهو سه‌رجه‌م ئه‌ندامان‌و به‌رپرس‌و توێژه‌رانی هۆبه‌ی خێزانی جێگرهوهو ڕێكخراوی (ستێپ) جێبه‌جێكاری پڕۆژه‌كه، كۆبوونه‌وه‌ی خولیی بۆردی سه‌رپه‌رشتیاری پڕۆژه‌ی خێزانی جێگره‌وه به‌ڕێوه‌چوو.
له كۆبوونه‌وه‌كه‌دا هه‌نگاوه‌كانی شه‌ش مانگی ڕابردووی پڕۆژه‌كه هه‌ڵسه‌نگاندنیان بۆ كرا‌و هه‌نگاوه‌كانی ئاینده له پێناو ته‌واوكردنی كاره‌كان‌و سه‌رخستنی پڕۆژه‌كه‌دا پلانیان بۆ دانرا، به‌تایبه‌ت بڕیاردرا له ئاینده‌یه‌كی نزیكدا پڕۆژه‌كه به‌فه‌رمی ڕابگه‌یه‌نرێت.
له وته‌كه‌یدا عومه‌ر گوڵپی، ده‌ستخۆشی له هه‌موو ئه‌و لایه‌ن‌و كه‌سانه كرد كه به‌شدارن له پڕۆژه‌كه‌دا، هه‌روه‌ك هه‌نگاوه‌كانی پڕۆژه‌كه‌ی به گرنگ زانی له‌پێناو هێنانه‌دی ئامانجی كۆتایی‌‌و گه‌وره‌ی پڕۆژه‌كه‌دا كه به دامه‌زراوه‌كردنی ئه‌و بیرۆكه‌یه‌و به‌ده‌ستهێنانی توانایه‌تی بۆ گواستنه‌وه‌ی منداڵانی خانه‌كان بۆ خێزانه جێگره‌وه‌كان‌و سه‌رپه‌رشتیكردنیان له هه‌موو ڕووه‌كانه‌وه .
پڕۆژه‌ی خێزانی جێگره‌وه، پڕۆژه‌یه‌كی هاوبه‌شی نێوان ڕێكخراوی یونیسێف‌و وه‌زاره‌تی كارو كاروباری كۆمه‌ڵایه‌تییه‌و به‌سه‌رپه‌رشتی ڕێكخراوی ستێپ له‌شاری سلێمانی جێبه‌جێده‌كرێت، پڕۆژه‌كه ئامانجی گه‌ڕاندنه‌وه‌ی ئه‌و منداڵانه‌یه كه به‌هه‌ر هۆكارێك خێزانه‌كانیان له‌ده‌ستده‌ده‌ن بۆ ناو خێزانێك ئاماده‌ی وه‌رگرتن‌و به‌خێوكردنی منداڵ بێت.