له سێ ڕۆژی ڕابردوودا، نزیكه‌ی 700 كه‌س فۆرمیان پڕكردوه‌ته‌وه
پاش ده‌سپێكردنی پرۆسه‌ی سه‌رله‌نوێ تۆماركردنه‌وه‌‌و پشكنینه‌وه‌ی پزیشكی هاووڵاتیانی خاوه‌ن پێداویستی تایبه‌ت، له‌ماوه‌ی 3 ڕۆژی ڕاردوودا نزیكه‌ی 700 كه‌س فۆرمیان بۆ پڕكراوه‌ته‌وه.
ڕۆژی سێشه‌ممه، 26ی 7ی 2016، یه‌كه‌م ڕۆژی پڕكردنه‌وه‌ی فۆرم له تۆڕی پاراستنی كۆمه‌ڵایه‌تی سلێمانی بۆ هاووڵاتیانی خاوه‌ن پێداویستی تایبه‌ت ده‌ستی پێكرد، له‌ماوه‌ی ئه‌و 3 ڕۆژه‌شدا، واته ڕۆژانی سێشه‌ممه، چوارشه‌ممه، پێنجشه‌ممه، نزیكه‌ی 700 فۆرم پڕكراوه‌ته‌وه‌و یه‌كه‌م وه‌جبه‌ش له ڕۆژی پێنجشه‌ممه، پشكنینیان بۆ كراوه.
به پێی ڕاگه‌یه‌نراوی به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌لایه‌تی له پارێزگای سلێمانی، له ئێسته‌دا ته‌نها هاووڵاتیانی شاری سلێمانی پڕكردنه‌وه‌ی فۆرم‌و چوونه‌وه به‌رده‌م لیژنه پزیشكییه‌كان ده‌یانگرێته‌وه، تا ئه‌و كاته‌ی وه‌زاره‌تی ته‌ندروستی له شاره‌كانی هه‌ڵه‌بجه‌ی شه‌هید‌و چه‌مچه‌ماڵ‌و ڕانیه‌و قه‌ڵادزێ‌‌و ده‌ربه‌ندیخانیش لیژنه‌كان پێكده‌هێنێت.
هه‌ر به‌پێی ڕاگه‌یه‌نراوه‌كه‌ی به‌ڕێوه‌به‌رایه‌تی گشتی ناوشاری سلێمانیش كراوه به دوو قۆناغه‌وه، قۆناغی یه‌كه‌م ماوه‌ی مانگێگ ده‌خایه‌نێت‌و ئه‌و هاووڵاتیانه ده‌گرێته‌وه كه هیچ مووچه‌یه‌كیان نییه واته مووچه‌كانیان له تۆڕی پاراستن بڕی 150 هه‌زار دینارییه، پاشان عاووڵاتیانی تری خاوه‌ن پێداویستیش ده‌گرێته‌وه كه مووچه‌كانیان 100 هه‌زارییه، ئه‌وه‌ش به‌مه‌به‌ستی كه‌مكردنه‌وه‌ی قه‌ره‌باڵغی له‌به‌رده‌م لیژنه‌كانی پڕكردنه‌وه‌ی فۆرم .
|