3 پاڵێوراوی شایسته بۆ كاركردن له‌خانه‌ی ساوایان دیاریكران
.JPG)
به‌مه‌به‌ستی پڕكردنه‌وه‌ی 3 هه‌لی كار له خانه‌ی ساوایانی به‌ڕێوه‌به‌رایه‌تی چاودێری كۆمه‌ڵایه‌تی سلێمانی، پاش ڕاگه‌یاندن‌و ڕه‌خساندنی هه‌ل بۆ خوازیاران‌و ئه‌نجامدانی هه‌ڵسه‌نگاندن له ڕێگه‌ی چاوپێكه‌وتنه‌وه، ئه‌مڕۆ ناوی 3 پاڵێوراوی شایسته دیاریكران.
له‌و باره‌یه‌وه، به‌رپرسی ڕاگه‌یاندنی به‌ڕێوه‌به‌رایه‌تی گشتی ڕایگه‌یاند:"ئه‌و 3 به‌ڕێزه‌ی توانیویانه سه‌ركه‌وتووبن له هه‌ردوو قۆناغی سی ڤی‌‌و چاوپێكه‌وتن بریتیبوون له به‌ڕێزان : " نارین عه‌بدولكه‌ریم حه‌مه، نیگار ره‌فیق ئه‌حمه‌د، ڕه‌زیه مه‌هدی سه‌عید"، ئه‌م 3 ناوه ئه‌وانه‌بوون كه توانیویانه له ڕێگه‌ی زانیاریی‌‌و تواناییه‌كانی خۆیان‌و پاشان له ئه‌نجامی چاوپێكه‌وتنی لیژنه‌یه‌كی 5 كه‌سییه‌وه زۆرترین نمره كۆبكه‌نه‌وه‌‌و پێش هاوڕێكانیان بكه‌ون كه‌سه‌رجه‌میان 31 كه‌س بوون له‌قۆناغی چاوپێكه‌وتندا".
سه‌باره‌ت به جۆری ئه‌م كارگرێبه‌سته‌وه، به‌رپرسی ڕاگه‌یاندنی به‌ڕێوه‌به‌رایه‌تی گشتی ڕایگه‌یاند:" گرێبه‌ستێكی تایبه‌ته كه پاره‌ی مانگانه‌كه‌ی له ڕێگه‌ی خێرخوازانه‌وه ده‌ردێت‌و هیچ پابه‌ندییه‌كی حكومییان نییه، ئه‌و پاره‌یه‌ش له‌و هاوكارییانه ده‌درێت كه خێرخوازان پێشكه‌شی كۆمه‌ڵگه‌ی چاودێریی كۆمه‌ڵایه‌تی ده‌كه‌ن بۆ پهروهردهو به‌خێوكردنی منداڵانی ساوا، چونكه له ئێسته‌دا فشارێكی زۆر له‌سه‌ر ستافی ئه‌و خانه‌یه هه‌یه به‌هۆی زۆربوونی ژماره‌ی منداڵه‌كانه‌وه " .
|