ئه‌مڕۆ 4ی حوزه‌یرانی2016، له ته‌مه‌نی 94 ساڵیدا، كه‌سایه‌تی دیاری كوردستان پرۆفیسۆر د.مسته‌فا زه‌ڵمی گه‌وره زانای بواری شه‌رع‌و یاسا له شاری هه‌ولێر كۆچی دوایی كرد‌و له بۆنه‌یه‌كی شایسته‌دا ته‌رمه‌كه‌ی بۆ شاری سلێمانی‌‌و پاشان بۆ زێدی خۆی‌‌و له شارۆچكه‌ی خورماڵ به خاك سپێردرا .
به‌و بۆنه پڕ له ماته‌مه‌وه، به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی، پرسه‌نامه‌یه‌كی ئاراسته كرد كه ئه‌مه ده‌قه‌كه‌یه‌تی :
به‌ناوی خوای به‌خشنده‌ی میهره‌بان
به‌ڕێزان خانه‌واده‌ی زانای گه‌وره‌ی كورد، پڕۆفیسۆر د.مسته‌فا زه‌ڵمی
به‌بۆنه‌ی كۆچی دوایی زانای دیارو ناوداری گه‌لی كورد، پڕۆفیسۆر د.مسته‌فا زه‌ڵمی، سه‌ره‌خۆشی له خۆمان‌و ئێوه‌ی به‌ڕێز ده‌كه‌ین، له خوای گه‌وره داواكارین له گوناهی مامۆستای پایه‌به‌رز خۆش بێت‌و شوێنی به‌هه‌شتی به‌رین بێت‌و سه‌بوری ئێوه‌و ئێمه‌و هه‌موو خه‌ڵكی كوردستانیش بدات .
دیاره له ده‌ستدانی زاناو بیرمه‌ندو نووسه‌رو لێكۆڵه‌رو شه‌رعزانێكی گه‌وره‌ی وه‌ك پرۆفیسۆر د.مسته‌فا زه‌ڵمی، زیانێكی گه‌وره‌یه بۆ گه‌لی كوردو گه‌لانی مسوڵمان، ئه‌وه‌ش به‌هۆی به‌هره‌و كارو تێكۆشان‌و بۆچوونه گه‌وره‌و نوێكانی له بواری شه‌رع‌و یاسادا، ئه‌و به‌رهه‌م‌و كه‌له‌پورو زانسته گه‌وره‌یه‌ی كه به‌ر له هه‌ر لایه‌ك گه‌لی كورد لێی سود مه‌ند ده‌بوو و شانازییه‌كی گه‌وره‌بوو له بواری مه‌عریفی‌‌و زانستی له ئاستی گه‌وره زانایانی دونیادا .
ئێمه له‌م بۆنه پڕ له خه‌مه‌دا جارێكیتر پرسه‌و سه‌ره‌خۆشی خۆمان ئاراسته ده‌كه‌ین‌و له خوای گه‌وره ده‌پاڕێینه‌وه سه‌بوری هه‌موو لایه‌ك بدات‌و شوێنی مامۆستای زاناو داناش به‌هه‌شتی به‌رین بێت .
انا لله و انا الیه راجعون
به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی
5ی حوزه‌یرانی2016 - سلێمانی
ژیاننامەی پرۆفیسۆر د.مسته‌فا زەڵمی:
- مستەفا زەڵمی لە ساڵی 1924 لە گوندی زەڵمی هەورامانی سەر بە پارێزگای هەڵەبجە لەدایكبووە.
- ساڵی 1946 لە كۆیە خوێندنی ئایینی تەواوكردووە.
- ساڵی 1965 بەكالۆریۆسی لە یاسا لە زانكۆی بەغدا بەدەستهێناوە.
- ساڵی 1969 ماستەری لە شەریعە لە زانكۆی بەغدا بەدەستهێناوە.
- ساڵی 1971 ماستەری وەرگرتووە لە فیقهی بەراوردكاری لە زانكۆی ئەزهەر.
- ساڵی 1973 ماستەری لە یاسا هێناوەتەوە لە زانكۆی قاهیرە.
- ساڵی 1975 دكتۆرای لە فیقهی بەراوردكاری وەرگرتووە لە زانكۆی ئەزهەر بە پلەی شەرەف.
- ساڵی 2005 دكتۆرای دووەمی لە یاسا لە زانكۆی بەغدا وەرگرتووە بە پلەی ئیمتیاز.
- زیاتر لە 70 كتێب و توێژینەوەی لەبواری شەریعەی ئیسلامی و یاسا هەیە.
- لەبەرەبەیانی رۆژی شەممە 4-6-2016 لە شاری هەولێر كۆچی دوایی كرد.