له مه‌راسێمێكی شایسته‌دا، به ئاماده‌بوونی به‌رپرسانی حكومی‌‌و حزبی، په‌رده له‌سه‌ر گه‌وره‌ترین نه‌خشه‌ی كوردستانه له‌سه‌ر شێوه‌ی ئاڵای كوردستان له‌شاخی گۆیژه‌ی شاری سلێمانی لادرا.
ئێواره‌ی ڕۆژی هه‌ینی، 3ی حوزه‌یرانی2016، له پاركی مه‌لیك مه‌حمودی سلێمانی‌‌و به ئاماده‌بوونی ژماره‌یه‌كی زۆر له به‌رپرسانی حكومی‌‌و حزبی مه‌راسیمێكی شایسته به لادانی په‌رده له‌سه‌ر گه‌وره‌ترین نه‌خشه‌ی كوردستان كه‌له‌سه‌ر شێوه‌ی ئاڵای كوردستان له‌سه‌ر شاخی گۆیژه دروستكراوه .
له‌و مه‌راسیمه‌دا له‌لایه‌ن كامه‌ران عه‌بدوڵڵا، به‌ڕێوه‌به‌ری باخچه‌كانی سلێمانی وتارێك پێشكه‌شكرا كه تیایدا باسی له قه‌باره‌ی نه‌خشه‌كه‌و ناوی سلێمانی‌‌و بیرۆكه‌كانی‌‌و له ئه‌ستۆ گرتنی تێچووه‌كانی خسته ڕوو پاشان له‌لایه‌ن هه‌ریه‌كه له خاتوو هیرۆ ئیبراهیم ئه‌حمه‌د‌و د.ئاسۆ فه‌ره‌یدون، پارێزگاری سلێمانییه‌وه په‌رده له‌سه‌ر ئه‌و پڕۆژه گه‌وره‌یه لادرا .
جێی ئاماژه‌یه ناوی سلێمانی‌‌و نه‌خشه‌ی كوردستانی گه‌وره كه له‌سه‌ر شێوه‌ی ئاڵای كوردستان له‌سه‌ر شاخی گۆیژه دروستكراوه، به گه‌وره‌ترین ناوو نه‌خشه داده‌نرێت له هه‌موو جیهاندا كه به‌و قه‌باره‌و شێوه‌یه دروستكرابێت‌و بڕیاروایه له ئاینده‌دا هه‌وڵبدرێت ئه‌م كاره هونه‌رییه سیمبولییه گرنگه‌ی شاری پایته‌ختی ڕۆشنبیریی كوردستان بچێته كتێبی ژماره پێوانه‌ییه‌كانه‌وه (گینس) .
قه‌باره‌ی پڕۆژه‌كه:
پڕۆژه‌ی نه‌خشه‌ی كوردستان له‌سه‌ر رووبه‌ری 11.350 ( یازده هه‌زار و سێ سه‌د و په‌نجا) مه‌تر چوار گۆشه كه ده‌كاته (چوار دۆنم و نیو) زه‌وی، دروست كراوه.
پرۆژەکە زیاتر له دوو سه‌د تۆن ئاسنی تێدا به‌كارهاتووه‌و بۆیاخی حه‌راری جۆری (نانۆ) ته‌كنه‌لۆجی پلێته ئاسنینه‌كانی رووپۆشكراوه كه فسفۆڕییه‌و ره‌نگه‌كانی ئاڵاكه به روونی له رۆژدا ده‌رده‌كه‌وێت، پاشان به گڵۆپی لید (LED) به درێژی 7 هه‌زار مه‌تر ره‌نگه‌كانی (سوور، سپی، سه‌وز، زه‌رد) رازێندراوه‌ته‌وه.
له شه‌ودا هه‌موو نه‌خشه‌كه به ره‌نگه‌كانی ئاڵای كوردستان به روونی ده‌دره‌وشێته‌وه‌و له هه‌موو شوێنێكی شاری سلێمانیه‌وه دیار ده‌بێت، یه‌كێك له خاڵه ناوازه‌كانی پڕۆژه‌كه‌ش تۆكمه‌یی دروستكردن و جێگیرییه‌تی، كه ته‌مه‌نێكی درێژی پێ ده‌به‌خشێت و بۆ سه‌دان ساڵ ده‌مێنێته‌وه