سلێمانی، ئاهه‌نگێك منداڵانی ئاین‌و نه‌ته‌وه‌و مه‌زهه‌به جیاوازه‌كان كۆده‌كاته‌وه
به‌بۆنه‌ی 1ی حوزه‌یران، ڕۆژی جیهانی منداڵانه‌وه، به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی به هاوكاری ڕێكخراوی یونسێف ئاهه‌نگێك بۆ منداڵانی ئاواره‌و ئیشكه‌ر‌و سه‌ر به ئاین‌و نه‌ته‌وه‌و مه‌زهه‌به جیاوازه‌كان له‌ناو ناو شاری سلێمانی به‌ڕێوه چوو .
سه‌رله‌به‌یانی ڕۆژی چوارشه‌ممه، 1ی حوزه‌یرانی 2016، به‌سه‌رپه‌رشتی هه‌ردوو به‌شی پارێزگاری خێزان‌و پلان‌و هه‌ماهه‌نگی‌‌و هۆبه‌ی پاراستنی منداڵ له دیوانی به‌ڕێوه‌به‌رایه‌تی گشتی، ئاهه‌نگێكی تایبه‌ت به ڕۆژی جیهانی منداڵان له باخی گشتی شاری سلێمانی به‌ڕێوه‌چوو كه تیایدا منداڵانی خوێندنگاكان‌و سه‌رشه‌قام‌و ئیشكه‌ری ئاین‌و مه‌زهه‌ب‌و نه‌ته‌وه جیاوازه‌كان به كۆمه‌ڵێك چالاكی هونه‌ری‌‌و ڕۆشنبیریی به‌شداربوبون .
له‌و ئاهه‌نگه‌دا كه مایه‌ی خۆشحاڵی منداڵانی به‌شداربوو بوو، ژماره‌یه‌ك چالاكی جۆراوجۆری هونه‌ری‌‌و ڕۆشنبیری له‌لایه‌ن منداڵانه‌وه پێشكه‌شكران، هه‌روه‌ك به‌شێكی ئاهه‌نگه‌كه ته‌رخان بوو بۆ دابه‌شكردنی دیاریی به‌سه‌ر منداڵاندا، ئه‌وه‌ی جێگه‌ی بایه‌خی ئاماده‌كارانی ئاهه‌نگه‌كه‌و هه‌ڵسوڕێنه‌رانی بوو، به‌شداری ژماره‌یه‌كی زۆر له منداڵانی ئیشكه‌ری شه‌قامی ساڵم‌و مه‌وله‌وی بوو له‌و ئاهه‌نگه‌و پشودانیان بوو تیایدا .
|