وه‌ڵامی پرسیاره‌كان له‌باره‌ی هاوكاری كۆمه‌ڵایه‌تی خاوه‌ن پێداویستی تایبه‌ته‌وه
بۆ وه‌ڵامی ئه‌و پرسیاره زۆرانه‌ی په‌یوه‌ندییان به مووچه‌ی هاوكاری كۆمه‌ڵایه‌تی خاوه‌ن پێداویستی تایبه‌ت(كه‌مئه‌ندامان) هه‌یه‌‌و ئاراسته‌مان ده‌كرێت، عومه‌ر گوڵپی به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی ئه‌مڕۆ سێشه‌ممه، 31ی 5ی 2016 به‌مجۆره وه‌ڵامی ڕاگه‌یاندنه‌كانی دایه‌وه:
+ بڕی ئه‌و پاره‌یه‌ی بڕیاروایه بدرێت چه‌نده؟
_ ئه‌و بڕه مووچه‌یه‌ی بڕیاروایه ئه‌مڕۆو سبه‌ی بدرێت بڕه‌كه‌ی كه‌مكراوه‌ته‌وه به‌هۆی قه‌یرانی داراییه‌وه، ئه‌وه‌ش به‌هۆی كه‌مبوونه‌وه‌ی كۆی ته‌رخانكراوی هاوكاری كۆمه‌ڵایه‌تی له‌لایه‌ن وه‌زاره‌تی داراییه‌وه بۆ خاوه‌ن پێداویستی تایبه‌ت .
بڕه‌كه به‌مجۆره‌یه: ئه‌وانه‌ی هیچ مووچه‌یه‌كیان نییه‌و پێشتر بڕی 150 هه‌زار دیناریان وه‌رگرتووه ئێسته بڕی هه‌شتاو نۆ ههزارو پێنج سه‌د (89.500 ) دینار وه‌رده‌گرن، ئه‌و هاووڵاتیانه‌شی پێشتر بڕی (100) هه‌زار دیناریان وه‌رده‌گرت له ئێسته‌دا بڕی په‌نجاو نۆ ههزارو پێنج سه‌د (59.500) دینار وه‌رده‌گرن .
+ تاكه‌ی به‌مجۆره به‌رده‌وام ده‌بێت؟
- له ئێسته‌دا ئه‌م پاره‌یه‌ی دابه‌شده‌كرێت ته‌نها هاوكاری مانگی یه‌كی ساڵی 2016 یه، نازانم بۆ ئاینده چۆن‌و كه‌ی دابه‌شده‌كرێت .
+ كه‌ی دابه‌شده‌كرێت؟
- هه‌موو ئه‌وه‌ی له‌سه‌ر فه‌رمانگه‌كانی ئێمه‌یه ئه‌نجامدراوه، لیسته‌كان ئاراسته‌ی گه‌نجینه‌كان كراون، گه‌نجینه‌كان‌و پاشان بانكه‌كان كاری پێویست ئه‌نجام ده‌ده‌ن بۆ خه‌رجكردنی پاره‌كانیان‌و هیوادارم له‌م 2 ڕۆژه‌ی داهاتوودا بۆیان بكرێت دابه‌شی بكه‌ن . بۆ دڵنیابوونه‌وه‌ی باشترو بۆ ئه‌وه‌ی هاووڵاتیان ئه‌زیه‌ت نه‌كێشن له هه‌فته‌ی داهاتوودا سه‌ردانی بانك بكه‌ن بۆ وه‌رگرتنی .
+ بۆچوونتان له‌باره‌ی كه‌مبوونه‌وه‌ی هاوكارییه‌كان؟
- ئێمه پێمان خۆش نیه هاوكارییه كۆمه‌ڵایه‌تییه‌كان كه‌مبكرێنه‌وه، ته‌نانه‌ت به‌شێك له هۆكاری دواكه‌وتنیشی ئه‌وبوو كه وه‌زاره‌تی كار ڕازی نه‌ده‌بوو به كه‌مبوونه‌وه‌ی، دواجار به ڕێككه‌وتنی ڕێكخراوه‌كانی كه‌مئه‌ندامان‌و وه‌زیری كار له ڕۆژی پێنجشه‌ممه‌ی پێشوو بڕیاردرا به‌مجۆره بدرێت، هۆكاره سه‌ره‌كیش برتییه له‌وه‌ی به‌هۆی قه‌یرانی داراییه‌وه وه‌زاره‌تی دارایی توانیویه‌تی ته‌نها ئه‌و بڕه‌یه دابین بكات، هیوادارین به زوویی دۆخه‌كه بگه‌ڕێته‌وه شوێنی خۆی .
ئێمه كه ڕۆژانه ژیانی كه‌مئه‌ندامان ده‌بینین، ئه‌وه‌ی پێشووشمان به كه‌م ده‌زانی نه‌وه‌ك ئه‌وه‌ی ئێسته، هیواریین هۆكاره‌كان نه‌مێنن‌و حكومه‌ت باشتر ئاوڕ له ژیانی هه‌ژاره‌كان بداته‌وه .