عومه‌ر گوڵپی: پابه‌ندی به ڕێنماییه‌كان‌و وازهێنان له په‌یوه‌ندییه كۆمه‌ڵایه‌تییه‌كان سه‌خته، به‌ڵام ته‌ندروستی‌‌و سه‌لامه‌تی مرۆڤ گرنگترو له پێشتره
له میانه‌ی به‌شداریكردنی به‌رنامه‌ی په‌یامی ڕۆژ له كه‌ناڵی ئاسمانی په‌یام، ڕۆژی پێنجشه‌ممه، 19ی 3ی 2020، به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی وتی: " مرۆڤ بوونه‌وه‌رێكی كۆمه‌ڵایه‌تیه‌و به سروشتی خۆی بایه‌خ به یوه‌ندییه كۆمه‌ڵایه‌تییه‌كان ده‌دات‌و ئاینە ئاسمانییەکانیش به‌تایبه‌ت ئاینی ئیسلام له زۆر جێگه فه‌رمان به به‌هێزكردنی په‌یوه‌ندییه كۆمه‌ڵایه‌تییه‌كان ده‌كات‌و به‌جێهێنانی ئه‌و ئه‌ركانه له‌سه‌ر مرۆڤی پابه‌ند پێویست ده‌كات، به‌ڵام له دۆخێكی له‌مجۆره‌دا كاتێك مه‌ترسی له‌سه‌ر ژیان‌و سه‌لامه‌تی مرۆڤ دروست ده‌بێت، ئه‌وه ژیان‌و سه‌لامه‌تی مرۆڤ پێش هه‌ر شتێكه‌و پێویسته هاووڵاتیان‌و خێزانه‌كان پابه‌ندی ڕێنماییه‌كان بن‌و ئارام بگرن له مانه‌وه له ماڵه‌وه، تا ئه‌و كاته‌ی نه‌خۆشی‌‌و په‌تاكه تێده‌په‌ڕێت‌و هه‌موو ده‌گه‌ڕێینه‌وه دۆخێكی ئاسایی‌‌و ده‌توانین ئه‌وسا قه‌ره‌بووی هه‌موو په‌یوه‌ندییه كۆمه‌ڵایه‌تییه‌كان بكه‌ینه‌وه و ژیانی ئاسایی دەستپێبکەینەوە".
له ته‌وه‌رێكی تری به‌رنامه‌كه‌دا، به‌ڕێز به‌ڕێوه‌به‌ری گشتی له‌باره‌ی ژیانی منداڵان‌و به‌ساڵاچووان‌و سودمه‌ندانی ماڵه‌كان، وتی:" له‌گه‌ڵ سوپاس و ده‌ستخۆشیم بۆ به‌ڕێوه‌به‌رو كارمه‌ندانمان، به‌خۆشحاڵیه‌وه ئه‌وه‌ی پێویسته له ڕێوشوێونی خۆپارێزی دژی په‌تای كوشنده‌ی كۆرۆنا گیراوه‌ته‌به‌رو خزمه‌تگوزارییه‌كان له ئاستێكی باشدان‌و سوپاس بۆ خوا به‌ساڵاچووان‌و منداڵان له ته‌ندروستییه‌كی باشدان، و هیوای ته‌ندروستی باش بۆ هه‌موو هاووڵاتیان ده‌خوازین".
|