به‌ڕێوه‌به‌ری گشتی ماڵه‌كانی نه‌وجه‌وانانی كچان‌و ساوایان به‌سه‌رده‌كاته‌وه‌و ده‌ستخۆشی له كارمه‌ندان ده‌كات
ڕۆژی چوارشه‌ممه، 18ی 3ی 2020، به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی هه‌ردوو ماڵی نه‌وجه‌وانانی كچان‌و ماڵی ساوایانی به‌سه‌ركرده‌وه‌و له سه‌ردانه‌كه‌یدا چاوی به به‌رپرس‌و كارمه‌ندان كه‌وت و له ژیانی منداڵانی پرسییه‌وه.
هه‌ر له چوارچێوه‌ی سه‌ردانه‌كه‌یدا به‌ڕێز به‌ڕێوه‌به‌ری گشتی كاره‌كانی تیمی خۆپاراستنی ته‌ندروستی سه‌ر به‌مه‌ڵبه‌ندی ته‌ندروستی عه‌لی كه‌مالی به‌سه‌ركرده‌وه كه سه‌رقاڵی ڕشتنی ده‌رمانی دژه ڤایرۆس بوون له ماڵه‌كانی منداڵان‌و به‌ساڵاچووان.
هه‌ر له‌و سه‌ردانه‌یدا به‌ڕێز به‌ڕێوه‌به‌ری گشتی ده‌ستخۆشی له‌خاتوو ژیار جه‌لال، به‌ڕێوه‌به‌ری چاودێری كۆمه‌ڵایه‌تی سلێمانی‌‌و به‌ڕێزان خاتوو مراوری حاته‌م، به‌رپرسی ماڵی نه‌وجه‌وانانی كچان‌و خاتوو له‌یلا عه‌زیز مه‌ولود، به‌رپرسی ماڵی ساوایان و سه‌رجه‌م كارمه‌ندانی هه‌ردوو ماڵ‌و ماڵه‌كانی تر و بەرپرسان و کارمەندانى چاودێرى کۆمەڵایەتى كرد كه به خشته‌یه‌كی ڕێك‌و پێك ده‌وام‌و پابه‌ندییه‌كانیان ڕێكخستووه‌و ئه‌ركی خۆیان به‌رانبه‌ر منداڵان جێ به‌جێ ده‌كه‌ن.
هه‌روه‌ك له‌گه‌ڵ منداڵانی هه‌ردوو ماڵه‌كه به‌ڕێز به‌ڕێوه‌به‌ری گشتی گفتوگۆی كردو له كێشه‌و گرفته‌كانی كۆڵیه‌وه‌و ئامۆژگاریكردن كه پابه‌ندی ڕێنماییه‌كان بن‌و هه‌وڵ بده‌ن به ئارامیه‌وه ئه‌م قۆناغی ده‌رنه‌چوونه له ماڵ تێپه‌ڕێنن تا ئه‌و كاته‌ی پشتیوان به‌خوا مه‌ترسییه‌كانی په‌تای كۆرۆنا نامێنن ئه‌وسا هه‌موو ده‌گه‌ڕێینه‌وه ژیانی ئاسایی.
|