سه‌رجه‌م ڕێوشوێنه‌كانی خۆپارێزی لە ماڵی به‌ساڵاچووانی سلێمانی گیراوه‌ته‌به‌ر
ڕۆژی شه‌ممه، 7ی 3ی 2020، به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له‌پارێزگای سلێمانی، ماڵی به‌ساڵاچووانی سلێمانی به‌سه‌ركرده‌وه، ئه‌وه‌ش به‌مه‌به‌ستی دڵنیابوونه‌وه له باش به‌ڕێوه‌چوونی كاره‌كان‌و گرتنه‌به‌ری ڕێوشوێنه خۆپارێزییه‌كان له ڤایرۆسی كۆرۆنا.
له‌و به‌سه‌ركردنه‌وه‌یه‌دا به‌ڕێز به‌ڕێوه‌به‌ری گشتی سه‌رده‌دانی سه‌رجه‌م به‌ساڵاچووانی كردو له شوێنه‌كانی ژیانیان چاوی پێیان كه‌وت گوێی لێ گرتن، هه‌روه‌ك جه‌ختی كرده‌وه له‌سه‌ر جێ به‌جێكردنی ڕێنماییه ته‌ندروستییه‌كان كه خۆپاراسته له قه‌ره‌باڵغی‌‌و به‌ریه‌ككه‌وتن‌و ده‌ستشتنی به‌رده‌وام‌و به‌كارهێنانی ئه‌و مادده پاككه‌ره‌وانه‌ی كه دانراون بۆ زوو زوو ده‌ست پاككردنه‌وه پێیان.
دوا بەدوای سەردانەکە بەڕێز بەڕێوەبەری گشتی دەستخۆشی لە بەڕێوەبەرو بەرپرس‌و کارمەندانی چاودێری کۆمەڵایەتی و ماڵی بەساڵاچووانی سلێمانی و کارمەندانی تەندروستی کرد بۆ بەجێهێنانی ئەرکەکانیان، هاوکات ژمارەیەک رێنمایشی پێشکەش کردن.
|