+ وێنه، سلێمانی : بۆنه‌یه‌كی تایبه‌ت به هه‌فته‌ی نابیستان به‌ڕێوه‌چوو
به ئاماده‌بوونی به‌رپرسانی دامه‌زراوه كۆمه‌ڵایه‌تییه‌كان‌و ژماره‌یه‌ك له ئه‌ندامانی په‌رله‌مان‌و كه‌س‌و كاری منداڵانی نابیست، بۆنه‌یه‌كی تایبه‌ت به هه‌فته‌ی نابیستان له په‌یمانگای هیوای نابیستان به‌ڕێوه‌چوو .
ڕۆژی چوارشه‌ممه، 27ی نیسانی2016، به چاودێریی عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی‌‌و به ئاماده‌بوونی گه‌شه دارا حه‌فید، سه‌رۆكی لیژنه‌ی كارو كاروباری كۆمه‌ڵایه‌تی له په‌رله‌مانی كوردستان‌و غه‌ریب پێنجوێنی، ئه‌ندامی په‌رله‌مانی كوردستان‌و ژماره‌یه‌ك له كه‌سایه‌تی‌‌و كه‌س‌و كاری خوێندكارانی نابیست، په‌یمانگای هیوای نابیستان بۆنه‌یه‌كی تایبه‌تی به هه‌فته‌ی نابیستان به‌ڕێوه‌برد .
له‌و بۆنه‌یه‌دا كه به زمانی ئاماژه سرودی په‌یمانگای هیوای نابیستان به‌سه‌رپه‌رشتی م.به‌هار چاومار‌و پێشكه‌شكردنی خوێندكارانی په‌یمانگا پێشكه‌ش كرا، هه‌روه‌ها هه‌ر به زمانی ئاماژه وته‌یه‌كی خوێندكارانی په‌یمانگا خوێندرایه‌وه، پاشان پێشانگای ساڵانه‌ی خوێندكاران‌و مامۆستایان‌و ڕاهێنه‌رانی په‌یمانگا كرایه‌وه، ئه‌مه بێجگه له ژماره‌یه‌كی تری چالاكی خوێندكاران، هه‌روه‌ها دیاری تایبه‌ت به‌خشرایه سه‌رجه‌م خوێندكارانی په‌یمانگا .
په‌یمانگای هیوای نابیستان تاكه په‌یمانگای تایبه‌تمه‌نده به خوێندن‌و په‌روه‌رده‌ی منداڵانی نابیست‌و خوێندن تیایدا به زمانی ئاماژه‌یه‌و له قۆناغی باخچه‌وه تا پۆلی نۆی بنه‌ڕه‌تی ده‌گرێته خۆی‌‌و بۆ ئه‌مساڵی خوێندن 105 قوتابی هه‌یه‌و ساڵانه له 21ی تا 27ی نیسان، ژماره‌یه‌ك چالاكی جۆراوجۆر ئه‌نجامده‌دات، هاوشێپوه‌ی ژماره‌یه‌ك له وڵاتان.
|