وەزارەتی کارو کاروباری کۆمەڵایەتی ڕەشنوسی یاسای پاراستنی منداڵ ئامادە دەکات
ڕۆژی سێشه‌ممه، 19ی 11ی 2019، به ئاماده‌بوونی به‌ڕێز م.كوێستان موحه‌ممه‌د، وه‌زیری كارو كاروباری كۆمه‌ڵایه‌تی‌‌و به‌ڕێزان م.عومه‌ر گوڵپی، م.فواد سدیق، م.ده‌روون عومه‌ر، به‌ڕێوه‌به‌رانی گشتی وه‌زاره‌تی كارو كاروباری كۆمه‌ڵایه‌تی‌‌و ژماره‌یه‌ك له به‌رپرس‌و كادیرانی وه‌زاره‌ت‌و نوێنه‌رانی وه‌زاره‌ته په‌یوه‌ندیداره‌كان‌و ڕاوێژكارو شاره‌زایانی یاسایی‌‌و نوێنه‌رانی ڕێكخراوه مه‌ده‌نییه‌كانی بواری پاراستنی منداڵ، وه‌زاره‌تی كاروكاروباری كۆمه‌لایه‌تی به‌هاوكاری ڕێكخراوی یونسَف، ۆرك شۆپێكی ڕاوێژكاری بۆ گفتوگۆكردنی ڕه‌شنوسی یاسای پاراستنی منداڵ له هۆتێل كریستاڵ له شاری هه‌ولێر به‌ڕێوه‌برد.
له‌و ۆرك شۆپه‌دا كه بڕیاره دوو ڕۆژ بخایه‌نێت، به‌ڕێز وه‌زیری كارو كاروباری كۆمه‌ڵایه‌تی وته‌یه‌كی پێشكه‌شكردو له وته‌كه‌یدا جه‌ختی له‌سه‌ر بایه‌خی هێنانه كایه‌ی ئه‌و یاسایه كرد بۆ كوردستان كه ده‌بێته هۆی به‌رزبوونه‌وه‌ی ئه‌و ئاست و چوارچێویه‌ی كه ئێسته كار ده‌كات بۆ پاراستنی منداڵ‌و ده‌سته‌به‌ركردنی مافه‌كانی، لای خۆیه‌وه پاڵپشتی وه‌زاره‌تی كارو كاروباری كۆمه‌ڵایه‌تی دووپاتكرده‌وه بۆ سه‌رخستنی ئه‌و ڕه‌شنوسه تا گه‌یشتنی به قۆناغی ده‌رچوواندنی له په‌رله‌مانی كوردستان.
|