سیمینارێك سه‌باره‌ت به ( كۆنگره‌ی په‌یماننامه‌ی نێوده‌وڵه‌تی خێزان له ئه‌سته‌نبوڵ )
له ئاماده‌كردنی یه‌كێتی ئیسلامی كورد، به‌هاوكاری ڕێكخراوی یه‌كگرتووی خوشكانی ئیسلامی كوردستان، له هوتێل تایتانیك، سیمینارێك بۆ پرۆفیسۆر د.عه‌لی قه‌ره‌داخی سه‌باره‌ت به ( كۆنگره‌ی نێوده‌وڵه‌تی ڕێككه‌وتننامه‌ی خێزان له ئه‌سته‌مبوڵ) به‌ڕێوه‌چوو .
سه‌عات 4ی ڕۆژی دووشه‌ممه، 25ی نیسانی 2016، له شاری سلێمانی‌‌و له هۆڵی هۆتێل تایتانیك، به ئاماده‌بوونی ژماره‌یه‌ك له ڕێكخراوه‌كانی كۆمه‌ڵگه‌ی مه‌ده‌نی‌‌و په‌رله‌مانتاران‌و زانایانی ئاینی‌‌و ڕۆشنبیران، سیمینارێكی تایبه‌ت به خستنه‌ڕووی ڕه‌شنووسی ( كۆنگره‌ی نێوده‌وڵه‌تی ڕێككه‌وتننامه‌ی خێزان له ئه‌سته‌مبوڵ ) بۆ پڕۆفیسۆر د.عه‌لی قه‌ره‌داخی، ئه‌مینداری یه‌كێتی جیهانی زانایانی مسوڵمان به‌ڕێوه‌چوو .
له‌و سیمیناره‌دا باس له ناوه‌ڕۆكی په‌یماننامه‌كه كراو بایه‌خی بۆ ئێسته‌ی ژیانی كۆمه‌ڵایه‌یتی وڵاتانی مسوڵمان خرایه ڕوو، هه‌روه‌ك به‌شداربووانیش به گفتوگۆو سه‌رنجه‌كانیان به‌شداری سیمیناره‌كه‌یان كرد .
له‌باره‌ی ناوه‌ڕۆكی سیمیناره‌كه‌وه، عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی كه ئاماده‌ی سیمیناره‌كه بوو له په‌یجی تایبه‌تی خۆی له تۆڕی كۆمه‌ڵایه‌تی فه‌یس بووك نووسیویه‌تی: " خێزان به پێكهاته سروشتییه‌كه‌ی ( باوك‌و دایك‌و منداڵ ) گرنگترین یه‌كه‌ی كۆمه‌ڵگه‌یه، خاڵی هاوبه‌شی هه‌موو ئاینه‌كان، گه‌لان‌و ئه‌و مرۆڤانه‌یه له‌سه‌ر سروشتی ڕاست‌و پاك ماونه‌ته‌وه، بۆیه پێویسته هه‌موو به ئه‌ركی خۆمانی بزانین له‌پێناو خێزانێكی به‌هێز، په‌روه‌رده‌یه‌كی نوێ بۆ منداڵ‌و نه‌وه‌كان، وێستگه‌‌و لانه‌یه‌ك بۆ ئارامی تێبكۆشین ... سه‌ره‌ڕای سه‌رنج‌و تێبینییه‌كان سه‌باره‌ت به به‌ڕێوه‌چوونی سیمیناره‌كه‌و پێشینه‌ی كاره‌كان‌و شێوازی وه‌رگرتنی ڕای كۆمه‌ڵگایی له كوردستان، كارو پڕۆژه‌‌و ماندووبوونه‌كه جێگه‌ی ده‌ستخۆشییه " .
|