له‌ماوه‌ی سێ مانگدا (165) سه‌ردانی دایه‌نگه كراوه‌و (63) دایه‌نگه سزا دراون
به پێی ڕاپۆرتی سێ مانگی ڕابردووی به‌شی دایه‌نگه‌كانی به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌لایه‌تی له پارێزگای سلێمانی له ڕێگه‌ی لیژنه‌كانی سه‌رپه‌رشتی‌‌و به‌دواداچوونه‌وه توانیویه‌تی (165) سه‌ردان بۆ دایه‌نگه حكومی‌‌و ناحكومییه‌كان ئه‌نجام بدات.
هه‌ر به پێی ڕاپۆرته‌كه له ئه‌نجامی ئه‌و به‌دواداچوونانه (62) دایه‌نگه‌ی سزای پابه‌ندیان وه‌رگرتووه‌و یه‌ك دایه‌نگه‌ش سزای (ئاگاداركردنه‌وه) دراوه‌‌و یه‌ك دایه‌نگه‌ش سوپاسكراوه.
هه‌ر به پێی ئه‌و ڕاپۆرته ژماره‌ی ئه‌و دایه‌نگایانه‌ی كه مۆڵه‌تی نوێیان وه‌رگرتووه (6) دایه‌نگه‌بوون‌و (2) دایه‌نگه‌ش له‌سه‌ر داوای خۆیان داخراون‌و هیچ دایه‌نگه‌یه‌كیش به‌هۆی سزاوه دانه‌خراوه.
به‌شی دایه‌نگه‌كان له به‌ڕێوه‌به‌رایه‌تی گشتی به پێی به‌رنامه‌و پلانی ساڵانه‌ی خۆی به‌رده‌وام چاودێری دایه‌نگه‌كان ده‌كات‌و كار ده‌كات بۆ ئه‌وه‌ی دایه‌نگه‌كان شوێنێكی شایسته‌بن بۆ گه‌شه‌ی منداڵ.
له‌باره‌ی كاره‌كانیانه‌وه، به‌ڕێز هیوا سه‌عید، به‌رپرسی به‌شی دایه‌نگه‌كان پێی ڕاگه‌یاندین: " به‌هۆی باشبوونی ده‌وام‌و خواست له‌سه‌ر دایه‌نگه‌كان زیاتر بووه‌و ئه‌وپه‌ڕی توانای خۆمان خستووه‌ته گه‌ڕ توانای دایه‌نگه‌كانمان به كردنه‌وه‌ی ڕاهێنان‌و ئاراسته‌كردن‌و سه‌رپه‌رشتی به‌رز بكه‌ینه‌وه‌و له‌و ئاسته باشه‌ی هه‌مان بیگه‌یه‌نینه ئاستی به‌رزتر، سیستم‌و یاساو ڕێنماییه‌كان‌و بڕیاره‌كانی به‌ڕێوه‌به‌رایه‌تی گشتیمان بنه‌ماكانی كارمانن، له ئێسته‌شدا ده‌ستمانكردووه به هه‌ڵسه‌نگاندنی دایه‌نگه‌كان بۆ ساڵی 2019و ئه‌نجامه‌كه‌شی به فه‌رمی بڵاو ده‌كه‌ینه‌وه هاوشێوه‌ی دوو ساڵی ڕابردوو".
|