به‌ڕێوه‌به‌رایه‌تی گشتی یاداشتێكی لێكتێگه‌یشتن له‌گه‌ڵ ڕێكخراوی ڕیچ(reach) واژۆ ده‌كات
ڕۆژی چوارشه‌ممه، 17ی 7ی 2019، به ئاماده‌بوونی به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی‌‌و هه‌ریه‌كه له به‌ڕێزان ئه‌ڵوه‌ن عه‌بدولغه‌فوور، یاریده‌ده‌ری به‌ڕێوه‌به‌ری گشتی بۆ كاروباری هونه‌ری‌‌و ژماره‌یه‌ك له شاره‌زاكانی دیوان‌و به‌رپرسی به‌شه‌كان، به‌ڕێوه‌به‌رایه‌تی گشتی یاداشتێكی لێكتێگه‌یشتنی له‌گه‌ڵ ڕێكخراوی (REACH - ڕێكخراوی ئاوه‌دانكردنه‌وه‌و فێركردن‌و ته‌ندروستی كۆمه‌ڵ) واژۆ كرد.
له‌و بۆنه‌یه‌دا كه هه‌ریه‌كه له به‌ڕێزان ئه‌ندازیار سامان ئه‌حمه‌د مه‌جید، به‌ڕێوه‌به‌ری گشتی ڕێكخراوو م.ئاكام کەمال، به‌ڕێوه‌به‌ری پڕۆژه له ڕێكخراوی ڕێچ ئاماده‌یبوون، هه‌ردوو لا ڕێككه‌وتن له‌سه‌ر دروستكردنی سه‌نته‌رێكی كۆمه‌ڵایه‌تی به‌ناوی سه‌نته‌ری (لیزا) له شاره‌دێی بازیان بۆ خزمه‌تكردنی هاووڵاتیانی ئاواره‌‌و په‌نابه‌رو خانه‌خوێ.
به پێی یاداشتی لێكتێگه‌یشتنه‌كه ئه‌و سه‌نته‌ره له‌سه‌ر پارچه زه‌وییه‌ك له شاره‌دێی بازیان به تێچوونی (86.300,000 - هه‌شتاو شه‌ش ملیۆن‌و سێسه‌د هه‌زار دینار) له ماوه‌ی (90) ڕۆژدا به سه‌رجه‌م پێداویستییه‌كانیه‌وه دروست ده‌كرێت.
سه‌نته‌ره‌كه بۆ ماوه‌ی چوار ساڵ له‌لایه‌ن ڕێكخراوی ناوبراوه‌وه به‌ڕێوه ده‌برێت‌و تیایدا له بواری جیاجیاكانی كاری كۆمه‌ڵایه‌تیدا بێ به‌رانبه‌ر خزمه‌تی هاووڵاتیانی ئه‌و شاره دێیه‌و ده‌وروبه‌ری ده‌كات.
|