بەڕێوەبەری گشتی پێشوازی لە شاندێکی کۆمپانیای قەیوان دەکات‌و سوپاسی پشتیوانیه‌كانیان ده‌كات
ڕۆژی سێشه‌ممه، 7ی 5ی 2019، به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌لایه‌ت له پارێزگای سلێمانی به ئاماده‌بوونی به‌ڕێزان نوخشه ڕه‌سوڵ، به‌ڕێوه‌به‌ری كارگێڕی دیوان‌و ڕێزان گورون، به‌رپرسی به‌شی ژمێریاری، پێشوازیكرد له شاندێكی كۆمپانیای قه‌یوان كه پێكهاتبوون له به‌ڕێزان كاك ئه‌له‌ند، به‌رپرسی ڕاگه‌یاندنی كۆمپانیاو سۆزان عه‌لی، به‌رپرسی كاری خێرخوازی له كۆمپانیای مایه سه‌ر به كۆمپانیای قه‌یوان.
سه‌ردانی شاندی كۆمپانیای قه‌یوان به‌مه‌به‌ستی پشتیوانیكردنی دامه‌زراوه كۆمه‌ڵایه‌تییه‌كان بوو به‌تایبه‌ت ماڵه‌كانی به‌ساڵاچووان و منداڵان له ڕێگه‌ی ئه‌ژماری هاوكاری خێرخوازان سه‌ر به به‌ڕێوه‌به‌رایه‌تی چاودێری كۆمه‌ڵایه‌تی سلێمانی.
له‌و دیداره‌دا به‌ڕێز به‌ڕێوه‌به‌ری گشتی سوپاس‌و ده‌ستخۆشی خۆی ئاراسته‌ی خاوه‌ن‌و به‌ڕێوه‌به‌ری كۆمپانیای قه‌یوان كرد كه هاوكارو پاڵپشتی دامه‌زراوه‌ی كۆمه‌ڵایه‌تییه، و هیوای خواست نمونه‌یان زۆربێت، و هه‌روه‌ك ئومێده‌واربوو سه‌رجه‌م سه‌رمایه‌داران و كه‌سایه‌تییه‌كان و كۆمپانیاكان ئه‌ركی خۆیان به‌رانبه‌ر دامه‌رزاوه كۆمه‌ڵایه‌تییه‌كان به‌جێبهێنن بۆ داپۆشین‌و كه‌مكردنه‌وه‌ی ئه‌و كه‌لێنه‌ی له بودجه‌ی دامه‌زراوه‌ی كۆمه‌ڵایه‌تی دروست ده‌بێت، هه‌روه‌ك ئاماژه‌شی به‌وه كرد كه له زۆر وڵاتی دونیا به‌شێكی گه‌وره‌ی بودجه‌ی دامه‌زراوه كۆمه‌ڵایه‌تییه‌كان پشت ده‌به‌ستێت به‌و پشتیوانیه خێرخوازییه‌ی كه كه‌سایه‌تی‌‌و كۆمپانیاو خێرخوازان پێشكه‌شی ده‌كه‌ن.
ئه‌ژماری هاوكاری خێرخوازان حسابێكی خێرخوازییه كه پێشوازی له هاوكاری دارایی خێرخوازان ده‌كات‌و به شێوه‌یه‌كی زۆر باش خزمه‌ت به ماڵه‌كانی منداڵان‌و به‌ساڵاچووان و سودمه‌ندانیان ده‌كات له‌و بوارانه‌ی كه بودجه‌ی دامه‌زراوه‌ی كۆمه‌ڵایه‌تی كورتهێنانی هه‌یه، ئه‌وه‌ش هاوشێوه‌ی وڵاتانی دونیا كه خێرخوازان له‌م بواره‌دا ڕۆلێان هه‌یه.
|