په‌یمانگاكانی هاناو هیوا و ڕووناكی به چه‌ند چالاكییه‌ك هاوكاری چالاكییه‌كی به‌شی په‌روه‌رده‌ی تایبه‌ت له زانكۆی سلێمانی ده‌كه‌ن
له میانه‌ی به‌ڕێوه‌چوونی چالاكییه‌كی به‌شی په‌روه‌رده‌ی تایبه‌ت له زانكۆی سلێمانی، له هه‌ردوو ڕۆژی 28و 29ی 4ی 2019، په‌یمانگاكانی هانا بۆ په‌روه‌رده‌ی مێشك‌و ڕووناكی بۆ نابینایان‌و هیوا بۆ نابیستان به چه‌ند چالاكییه‌ك هاوكاری ئه‌و به‌شه‌ی زانكۆ بوون.
له‌و چالاكییه‌دا ژماره‌یه‌ك سیمینار به ناونیشانی ئێستاو ئاینده‌ی په‌روه‌رده‌ی تایبه‌ت به‌ڕێوه‌چوو، له چه‌ند به‌شێكی ئه‌و چالاكییه‌دا په‌یمانگاكانی سنوری كاری به‌ڕێوه‌به‌رایه‌تی چاودێری‌‌و كه‌مئه‌ندامانی سلێمانی هاوكاری چالاكییه‌كه‌بوون.
یه‌كێك له سیمیناره‌كان بریتبوو له كێشه‌و له‌مپه‌ره‌كانی به‌رده‌م په‌یمانگاو سه‌نته‌ره‌كانی ڕاهێنان‌و په‌روه‌رده‌ی تایبه‌تی سه‌ر به وه‌زاره‌تی كارو كاروباری كۆمه‌ڵایه‌تی بوو كه له‌لایه‌ن به‌ڕێز نازه‌نین عه‌لی، به‌ڕێوه‌به‌ری په‌یمانگای هانا به‌ڕێوه‌چوو.
له سیمیناره‌كه‌یدا به‌ڕێز نازه‌نین عه‌لی، سه‌ره‌ڕای خستنه‌ڕوو و ناساندنی په‌یمانگاكان‌و ئه‌و كاره گرنگ‌و گه‌وره‌یه‌ی پێشكه‌شی ده‌كه‌ن ،له هه‌مان كاتدا ئاماژه‌ی به كێشه‌و گرفته‌كانی په‌یمانگاو سه‌نته‌ره‌كان كرد، به‌تایبه‌ت له ڕووی پڕۆگرام‌و ڕاهێنانی ستافه‌كان‌و كۆنی یاساو ڕێنماییه‌كان.
|