به‌ڕێوه‌به‌ری گشتی پێشوازی له ڕێكخراوی دابین ده‌كات‌و ڕاپۆرتێك له‌سه‌ر ڕه‌وشی ژنان وه‌رده‌گرێت
ڕۆژی دووشه‌ممه، 15ی 4ی 2019، به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی پێشوازیكرد له به‌ڕێز خاتوو دڵسۆز زه‌نگه‌نه، به‌ڕێوه‌به‌ری ڕێكخراوی دابین.
ئامانجی دیداره‌كه بریتبوو له گه‌یاندنی ڕاپۆرتی ده‌رئه‌نجامی پڕۆژه‌ی (به‌دیهێنانی ژینگه‌یه‌كی گونجاو بۆ ژنان له ژیانی گشتیدا له هه‌رێمی كوردستان) كه ڕێكخراوی دابین له هاوكاری ڕێكخراوی (NED)ی ئه‌مریكی ئاماده‌یان كردبوو.
له پڕۆژه‌كه‌داو له ڕێگه‌ی دابه‌شكردنی فۆرم‌و زانینی بۆچوونی هاووڵاتیان و به‌رپرسان و كارمه‌ندانه‌وه له كه‌رتی گشتی، ڕێكخراوه‌كه گه‌یشتوه‌ته ده‌رئه‌نجامێك سه‌باره‌ت به ڕۆڵپێدانی ژنان و ڕه‌خساندنی ژینگه‌یه‌كی گونجاو بۆ كاری ژنان له كۆمه‌ڵگه‌دا كه بریته له ڕاسپارده‌ی پڕۆژه‌كه (8)خاڵدا، كه له هێندێك به‌شی ڕاسپارده‌كاندا داواكاری تێدایه بۆ پاراستنی مافی ژنان له گێڕانی ڕۆڵیان له پله‌و پۆست‌و به‌رپرسیارێتی گشتیدا.
له‌و باره‌یه‌وه به‌ڕێز به‌ڕێوه‌به‌ری گشتی جه‌ختی كرده‌وه له‌سه‌ر گرنگی و بایه‌خی كاره‌كه‌و ئه‌وه‌ی دووپاتكرده‌وه كه ئه‌وان وه‌ك به‌ڕێوه‌به‌رایه‌تی گشتی له چوارچێوه‌ی یاساو ڕێنماییه‌كاندا مافی ژنان ده‌پارێزن‌و پاڵپشتی پرۆسه‌ی ڕۆڵپێدانیان ده‌كه‌ن‌و ئه‌وه‌ی بۆیان بكرێت بۆ هێنانه‌دی ناوه‌ڕۆكی ڕاپۆرته‌كه كه‌مته‌رخه‌می ناكه‌ن.
|