سلێمانی: هەفتەی ژیاندۆستی بۆ پەروەردەیەکی ژیاندۆست لە ١٤ قوتابخانە به‌ڕێوه‌چوو
به ئامانجی په‌ره‌پێدان به په‌روه‌رده‌ی ژیاندۆستی و ئاشناكردنی منداڵان و دایكان و باوكانی قوتابیان‌و هاووڵاتیان به‌رزكردنه‌وه‌ی ئاستی هوشیارییان بۆ بواره جیاجیاكانی ژیان، به به‌شداری ژماره‌یه‌ك به‌ڕێوه‌به‌رایه‌تی و به‌ڕێوه‌به‌رایه‌تی گشتی، هه‌فته‌ی ژیاندۆستی له 14 قوتابخانه‌ی شاری سلێمانی به‌ڕێوه‌چوو.
ڕۆژی یه‌كشه‌ممه، 21ی 4ی 2019، به ئاماده‌بوونی به‌ڕێزان د.هه‌ڤاڵ ئه‌بوبه‌كر، پارێزگاری سلێمانی‌‌و م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌لایه‌تی له‌پارێزگای سلێمانی‌‌و م.دڵشاد عومه‌ر، به‌ڕێوه‌به‌ری گشت په‌روه‌رده‌و سالار حسامه‌دین، به‌ڕێوه‌به‌ری گشتی كارهباو به‌ڕێوه‌به‌ری فه‌رمانگه‌كانی ژینگه‌و ئاوو ماف و په‌روه‌رده‌كانی ڕۆژهه‌ڵات‌و ڕۆژئاوای شاری سلێمانی و به‌ڕێوه‌به‌رو مامۆستاو قوتابیان، هه‌فته‌ی چالاكییه‌كانی ژیاندۆستی له قوتابخانه‌ی دابانی بنه‌ڕه‌تی به‌ڕێوه‌چوو.
هه‌فته‌ی ژیاندۆستی له ڕێگه‌ی چه‌ند چالاكییه په‌روه‌رده‌یی، هونه‌ری، وه‌رزشییه‌وه كارده‌كات بۆ ئاشناكردنی منداڵان و قوتابیان‌و دایك‌و باوكی قوتابیان‌و هاووڵاتیان به پرسه‌كانی په‌یوه‌ست به مافی مرۆڤ‌و مافی هاووڵاتیانی خاوه‌ن پێداویستی تایبه‌ت‌و ژینگه‌و به‌فیڕۆنه‌دانی سامانی ئاوو كارهباو گرنگیدان به ته‌ندروستی‌‌و وه‌رزش .
له‌و بۆنه‌یه‌داو بۆ ماوه‌ی دوو ڕۆژ له 14 قوتابخانه‌ی شاری سلێمانی چالاكییه به‌ڕێوه ده‌چێت كه بریتین لە قوتابخانەکانی (سەرشەقام، خۆشناو، سۆران، هەورامان، پیشکەوتن، مەشخەڵان، دابان) لە پەروەردەی ڕۆژهەڵات‌و قوتابخانەکانی (مەم و زین، بێکەس، سیوەیل، نەهری، بەخشندە، ئارین، جونیەر) لە پەروەردەی ڕۆژئاوای شاری سلێمانی.
له‌و بۆنه‌یه‌دا به‌ڕێز د.هه‌ڤاڵ ئه‌بوبه‌كر، پارێزگاری سلێمانی وته‌یه‌كی پێشكه‌شكردو له وته‌كه‌یدا ده‌ستخۆشی و سوپاسی ئاراسته‌ی قوتابی و مامۆستایان‌و سه‌رجه‌م فه‌رمانگه به‌شداربووه‌كان كردو پاڵپشتی خۆی بۆ ئه‌و جۆره چالاكییانه‌ی دووپاتكرده‌وه.
هه‌ر له‌و بۆنه‌یه‌دا به‌ڕێز ئاكۆ عه‌بدولمه‌جید، سه‌رپه‌رشتیاری گشتی پڕۆژه‌كه ده‌ستخۆشی له سه‌رجه‌م نوێنه‌ری فه‌رمانگه‌كان‌و به‌ڕێوه‌به‌رو مامۆستایان كرد بۆ سه‌رخستنی بیرۆكه‌كه، هه‌روه‌ك هیوای خواست له ساڵی داهاتوودا به پشتیوانی هه‌موو لایه‌ك بیرۆكه‌كه په‌ره پێبده‌ن بۆ سه‌رجه‌م خوێندنگه‌كان.