به‌ڕێوه‌به‌رایه‌تی گشتیمان یاداشتێكی لێكتێگه‌یشتن له‌گه‌ڵ به‌ڕێوبه‌رایه‌تی به‌ره‌نگاربوونه‌وه‌ی توندوتیژی واژۆ ده‌كات
ڕۆژی یه‌كشه‌ممه، 11ی 11ی 2018، هه‌ردوو به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی و به‌ڕێوه‌به‌رایه‌تی به‌ره‌نگاربوونه‌وه‌ی توندوتیژی خێزانی له سلێمانی یاداشتێكی لێكتێگه‌یشتنیان واژۆكرد.
ناوه‌ڕۆكی یاداشته‌كه بریتییه له ڕێكخستنی هه‌ماهه‌نگی و په‌یوه‌ندی نێوان ماڵی داڵده‌دانی ژنانی هه‌ڕه‌شه‌لێكراوی سلێمانی و سه‌نته‌ری ڕاوێژكاری خێزانی له به‌ڕێوه‌به‌رایه‌تی به‌ره‌نگاربوونه‌وه‌ی توندوتیژی.
به‌ندو بڕگه‌كانی یاداشته‌كه له چوارچێوه‌ی یاساو ڕێنماییه كارپێكراوه‌كان و ئامانجه‌كانی هه‌ردوو دامه‌زراوه‌دایه كه خزمه‌تكردنی زیاتری ڕزگاربووانی توندوتیژی و سودمه‌ندانی ماڵی داڵده‌دانی ژنانی هه‌ڕه‌شه‌لێكراوه.
یاداشته‌كه له نێوان هه‌ردوو به‌ڕێزان م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی و به‌ڕێز عه‌مید سه‌ركه‌وت عومه‌ر، به‌ڕێوه‌به‌ری به‌رێوه‌به‌رایه‌تی به‌ره‌نگاربوونه‌وه‌ی توندوتیژی خێزانی به ئاماده‌بوونی به‌ڕێزان خاتوو ئه‌ڵوه‌ن عه‌بدولغه‌فوور، یاریده‌ده‌ری به‌ڕێوه‌به‌ری گشتی و سۆران سه‌عید،به‌رپرسی به‌شی پلان و شیلان عه‌لی، به‌رێوه‌به‌ری ماڵی داڵده‌دان و ڕائید هێمن عه‌بدولقادر، به‌رپرسی سه‌نته‌ری ڕاوێژكاری خێزانی واژۆكرا.
له وته‌یه‌كیدا به‌ڕێز م.عومه‌ر گوڵپی، به‌ڕێوه‌به‌ری گشتی ده‌ستخۆشی له هه‌ردوو دامه‌زراوه كرد له ڕاپه‌ڕاندنی كاره‌كانیان به دڵسۆزی و هیوای خواست یاداشته‌كه باشتر په‌یوه‌ندی و هه‌ماهه‌نگی نێوان ماڵی داڵده‌دان و به‌ڕێوه‌به‌رایه‌تی به‌ره‌نگاربوونه‌وه‌ی توندوتیژی ڕێكبخات و هه‌ردوولا باشتر خزمه‌تی سودمه‌ندان بكه‌ن له كچان و ژنانی هه‌ڕه‌شه‌لێكراوو داڵده‌دراو.