به‌ڕێوبه‌رایه‌تی گشتی كۆبوونەوەیەكی تایبه‌تی ڕاوێژكاری زانستی تایبەت بە دایەنگەكان به‌ڕێوه ده‌بات
ڕۆژی پێنجشه‌ممه، 1ی 3ی 2018، به سه‌رپه‌رشتی به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی‌‌و ئاماده‌بوونی ژماره‌یه‌ك له پسپۆڕو شاره‌زایانی پزیشكی‌‌و ده‌روونی‌‌و زمانه‌وانی‌‌و كاری كۆمه‌ڵایه‌تی‌‌و به‌رپرسانی به‌ڕێوه‌به‌رایه‌تی گشتی‌‌و به‌ڕێوه‌به‌ری ژماره‌یه‌ك له دایه‌نگه‌ی حكومی‌‌و ناحكومی كۆبوونه‌وه‌یه‌كی ڕاوێژكاری تایبه‌ت به پرسی به (زمان‌و زمانی دایك لای منداڵی دایه‌نگه) به‌ڕێوه‌چوو.
له كۆبوونه‌وه‌كه‌دا بابه‌تی بایه‌خ‌و گرنگی زمان‌و زمانی دایك له دایه‌نگه خرایه به‌رباس‌و لێكۆڵینه‌وه، له گفتوگۆكاندا ئاماده‌بووان هه‌وڵیاندا وه‌ڵامی ئه‌م پرسیاره بده‌نه‌وه :(ئایا ده‌كرێت بێجگه زمانی دایك (واته زمانی كوردی) بۆ چالاكییه په‌روه‌رده‌یی‌‌و كۆمه‌ڵایه‌تی‌‌و ته‌رفیهییه‌كان به‌كاربهێنرێت؟).
ئاماده‌بووانی كۆبوونه‌وه‌كه پێكهاتبوون له كه‌سانی شاره‌زا له بواری جیاجیای په‌یوه‌ست به پرسی زمان‌و تواناییه‌كانی منداڵ بۆ فێربوونی زمان‌و بایه‌خی گرنگیدان به زمانی دایك لای منداڵ، كۆبوونه‌وه‌كه‌ش به ئه‌نجامێكی دڵخۆشكه‌ر سه‌ركه‌وتووانه كۆتایی هات كه له قۆناغی داهاتوودا ده‌بێته یه‌كێك له بڕیاره‌كانی به‌ڕێوه‌به‌رایه‌تی گشتی بۆ دایه‌نگه حكومی‌‌و ناحكومییه‌كان.
|