بەمەبەستی جێ به‌جێكردنی مادده‌ی (15) له یاسای ژماره (22)ی ساڵی (2011)ی ناسراو به یاسای ماف و ئیمتیازی خاوه‌ن پێداویستییه تایبه‌ته‌كان، به‌شی یاسای به‌ڕێوه‌به‌رایه‌تی گشتی داوا له ژماره‌یه‌ك فه‌رمانگه‌ی په‌یوندیدار ده‌كات هاوكاری بن له پێناو دروستكردنی ژینگه‌یه‌كی گونجاو بۆ ژیانی هاووڵاتیانی خاوه‌ن پێداویستی تایبه‌ت.
له نووسراوه‌كانی ژماره (823 تا 829) كه به‌رواری ڕۆژی 13ی 2ی 2019یان له‌سه‌ره، به‌شی یاسای به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی داوا ده‌كات هه‌ریه‌كه له (سه‌رۆكایه‌تی شاره‌وانی سلێمانی، قائمقامیه‌تی قه‌زای مه‌ڵبه‌ندی سلێمانی، به‌ڕێوه‌به‌رایه‌تی گشتی شاره‌وانییه‌كان، به‌ڕێوه‌به‌رایه‌تی گشتی وه‌به‌رهێنان، به‌ڕێوه‌به‌رایه‌تی گشتی ئه‌وقاف) هاوكاریان بێت له جێ به‌جێكردنی تایبه‌تمه‌ندییه ئه‌ندازیارییه‌كان له پڕۆژه‌و بیناو شوێنه گشتیه‌كاندا تایبه‌ت به هاووڵاتیانی خاوه‌ن پێداویستی تایبه‌ت (كه‌مئه‌ندامان).
له نووسراوانه‌دا، به‌ڕێوه‌به‌رایه‌تی گشتی داوای سێ خاڵ له دامه‌زراوه‌كان ده‌كات:
1ـ هیچ مۆڵه‌تێك نه‌درێت به هیچ پڕۆژه‌یه‌كی حكومی و ناحكومی هه‌تا بۆچوونی به‌شی ئه‌ندازیاریی له به‌ڕێوه‌به‌رایه‌تی گشتی كۆمه‌ڵایه‌تی وه‌رنه‌گیرێت هاوشێوه‌ی وه‌رگرتنی بۆچوونی لایه‌نه په‌یوه‌ندیداره‌كانی تر، له‌و باریه‌وه به‌شی ئه‌ندازیاری به‌ڕێوه‌به‌رایه‌تی گشتی كۆمه‌ڵایه‌تی ئاماده‌ی هه‌ر ئه‌ركێكه ڕووبه‌ڕووی ببێته‌وه.
2ـ سه‌باره‌ت به پڕۆژه كۆنه‌كان، هه‌ر تایبه‌تمه‌ندییه‌ك له ئێستادا توانای جێ به‌جێكردنی هه‌یه وه‌ك (ڕه‌مپای چوونه ژوره‌وه، ده‌ستشۆ، w.c، ...) به خاوه‌ن پڕۆژه‌كان دابنرێت و زیاد بكرێت.
3ـ كارمه‌ندێك ته‌رخان بكرێت بۆ ڕاییكردنی مامه‌ڵه‌ی هاووڵاتیانی خاوه‌ن پێداویستی تایبه‌ت تا هاووڵاتیان به‌هۆی هات و چۆی زۆره‌وه ماندوو نه‌بن.
هه‌ر له نووسراوه‌كه‌دا، وێنه‌یه‌ك له‌و ڕێبه‌ره‌ی كه به‌شی ئه‌ندازیاری ئاماده‌یكردووه هاوپێچ كراوه كه بریتیه له (ڕێبه‌ری تایبه‌تمه‌ندییه ئه‌ندازیارییه‌كانی بیناو پڕۆژه‌و شوێنه خزمه‌تگوزارییه‌كانی تایبه‌ت به هاووڵاتیانی خاوه‌ن پێداویستی تایبه‌ت (كه‌مئه‌ندامان)).
ئه‌م وێنانه‌ی خواره‌وه وێنه‌ی نووسراوه‌كانن: