به‌مه‌به‌ستی باشتر جێ به‌جێكرددنی سیستم و ڕێنماییه‌كانی دایه‌نگه‌و به‌رزكردنه‌وه ئاستی دایه‌نگه‌كان، به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌لایه‌تی له پارێزگای سلێمانی دایه‌نگه‌كان پابه‌ند ده‌كات به چه‌ند بڕیارو ڕێنماییه‌كه‌وه.
به پێی گشتاندنێك كه ژماره (515)ی له‌سه‌ره‌و له به‌رواری 22ی 1ی 2019 له به‌شی دایه‌نگه‌كان ده‌رچووه، به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی دایه‌نگه ناحكومییه‌كان پابه‌ند ده‌كات به چه‌ند بڕگه‌یه‌كی ڕێنماییه‌وه كه ده‌بێته هۆی به‌رزكردنه‌وه‌ی ئاستی دایه‌نگه‌كان و زیاتر و باشتر ڕه‌خساندنی ژینگه‌یه‌كی گونجاو بۆ گه‌شه‌ی منداڵ.
بڕیاره‌كانیش به‌مجۆره‌ن:
1ـ سه‌باره‌ت به ستاف:
ـ پێویسته دایه‌نگه‌كان له یه‌ك كاتدا پابه‌ندبن به بوونی به‌ڕێوه‌به‌ر كه هه‌ڵگری بڕوانامه‌ی به‌كالۆریۆس بێت‌و شاره‌زای په‌روه‌رده‌ی منداڵ و هه‌روه‌ها بوونی توێژه‌ری كۆمه‌ڵایه‌تی و ده‌روونی.
ـ پێویسته دایه‌نگه‌كان پابه‌ندبن به بوونی مامۆستای په‌روه‌رده‌یی و هونه‌ری.
ـ پێویسته دایه‌نگه‌كان پابه‌ندبن به بوونی یاریده‌ده‌ری پزیشك.
2ـ تایبه‌تمه‌ندێتی ستافه‌كان:
ـ نابێت ستافه‌كان له حكومه‌ت دامه‌زرابن.
ـ پێویسته به‌ڕێوه‌به‌رو ستافه‌كانی دایه‌نگه له نیو سه‌عات پێش ده‌وامی فه‌رمی فه‌رمانگه‌كان و نیو سی‌ه‌عات پاش ده‌وامی فه‌رمی فه‌رمانگه‌كان و به درێژایی هه‌فته له ده‌وامدابن، بۆ دوای ده‌وامی فه‌رمیش به پێی پێویستی منداڵه‌كان داده و كارمه‌ندی ئیداری ئاماده‌بێت.
ـ پێویسته ستافه‌كانی دایه‌نگه له ڕه‌گه‌زی مێ بن.
ـ پێویسته ستافه‌كان گرێبه‌ستی كاركردنیان هه‌بێت و ده‌سته‌به‌ری كۆمه‌ڵایه‌تییان بۆ كرابێت.
جێی ئاماژه‌به بۆ جێ به‌جێكردنی ئه‌م بڕیارو تایبه‌تمه‌ندییانه، لیژنه‌كانی سه‌رپه‌رشتی و به‌دواداچوون به به‌رده‌وامی سه‌ردانی دایه‌نگه‌كان ده‌كه‌ن و له كاتی بوونی پابه‌ندی و ڕه‌خساندنی ژینگه‌ی گونجاو سوپاس ئاراسته‌ی دایه‌نگه‌كان ده‌كه‌ن و له بوونی كه‌م و كورتیشدا به پێی جۆری سه‌رپێچی و كه‌م و كورتییه‌ك دایه‌نگه‌ی كه‌مته‌رخه‌م سزا ده‌درێت.