پاش سه‌ردانی شاندێكی به‌ڕێوه‌به‌رایه‌تی گشتی به سه‌رۆكایه‌تی به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی بۆ شاری چه‌مچه‌ماڵ له 6ی 11ی 2018،و له نزیكه‌وه به‌سه‌ركردنه‌وه‌ی ئه‌و بیست ماڵه هه‌ژاره‌ی كه له خانووه‌كانی موڵكی وه‌زاره‌تی كارو كاروباری كۆمه‌ڵایه‌تیدان‌و ژماره‌یان (20) خانووه، به هاوكاری به‌ڕێز پارێزگاری سلێمانی هاوكاری پێویست گه‌یه‌نرایه ئه‌و ماڵه هه‌ژارانه.
گه‌یاندنی هاوكارییه‌كان به سه‌رپه‌رشتی به‌ڕێز به‌رزان كه‌ریم، به‌ڕێوه‌به‌ری چاودێری كۆمه‌ڵایه‌تی چه‌مچه‌ماڵ‌و له ڕێگه‌ی لیژنه‌یه‌كی تایبه‌ته‌وه به سه‌رۆكایه‌تی به‌ڕێز زانا ناسیح، جێگری به‌ڕێوه‌به‌ری چاودێری‌‌و گه‌شه‌پێدانی كۆمه‌ڵایه‌تی چه‌مچه‌ماڵ‌و ئه‌ندامیه‌تی هه‌ریه‌ك له به‌ڕێزان (زاهیر ڕه‌شید سه‌عید، توانا فایه‌ق تاهیر) كارمه‌ند له هه‌مان به‌ڕێوه‌به‌رایه‌تی، له به‌رانبه‌ر كاری دڵسۆزانه‌شیاندا، به‌ڕێوه‌به‌ری گشتی سوپاسی تایبه‌تیان ئاراسته ده‌كات.
هاوكارییه‌كان به شێوه‌ی پێویستی هه‌ر خانه‌واده‌یه‌ك بوو له چاككردنی كێشه‌ی دڵۆپه‌كردنی بیناو دابینكردنی نه‌وت‌و سۆپاو پێویستی ماڵ‌و چاره‌سه‌ری ته‌ندروستی‌‌و هێندێك پێویستی تری جۆراو جۆر وه‌ك فه‌رش‌و كومپار.
هه‌روه‌ك چاره‌سه‌ركردنی نه‌خۆشی ژماره‌یه‌ك له نه‌خۆشانی ئه‌و ماڵانه له ڕێگه‌ی نه‌خۆشخانه‌ی به‌خشینه‌وه له شاری سلێمانی.
له گه‌یاندنی هاوكارییه‌كانیشدا به‌ڕێز كاك ڕه‌مك ڕه‌مه‌زان قائمقامی چه‌مچه‌ماڵ هاوكارو پاڵپشت بوو.
جێی ئاماژه‌یه له 21 خانووی موڵكی وه‌زاره‌تی كارو كاروباری كۆمه‌ڵایه‌تی له‌شاری چه‌مچه‌ماڵ كه به خانووه هه‌ژاره‌كان ناسراون، ژماره‌یه‌ك خێزان نیشته‌جێن كه سه‌ره‌ڕای هه‌ژاری، هێندێك له خێزانه‌كان به كێشه‌ی به‌ساڵاچوون و نه‌خۆشی ده‌رونیه‌وه ده‌ناڵێنن، ئه‌مه بێحگه له بوونی منداڵ‌و كه‌مئه‌ندام له نێو خێزانه‌كاندا.
ئه‌و هاوكارییانه‌ی گه‌یه‌نرانه ئه‌و خێزانانه نرخه‌كه‌یان نزیكی (10) ملیۆن دیناری كرده‌وه، به‌ڵام ئه‌و خانه‌وادانه پێویستیان به هاوكاریو چاودێری زیاتر هه‌یه و به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی سلێمانی سه‌ره‌ڕای به‌ڵێنی هه‌وڵی زیاتر بۆ هاوكارییان، داوا له خێرخوازانیش ده‌كات له‌م ڕوه‌وه هاوكاری ئه‌و ماڵه هه‌ژارانه‌و هه‌ژارانی تریش بن له شاری چه‌مچه‌ماڵ.