به‌ڕێوه‌به‌رایه‌تی گشتی یاداشتێكی لێكتێگه‌یشتن له‌گه‌ڵ ڕێكخراوی منداڵپارێز واژۆ ده‌كات
ڕۆژی یه‌كشه‌ممه، 25ی 11ی 2018، هه‌ریه‌كه له به‌ڕێوه‌به‌رایه‌تی گشتی و ڕێكخراوی منداڵپارێزی كوردستان یاداشتنامه‌یه‌كی لێكتێگه‌یشتنیان واژۆكرد بۆ پشتیوانی سه‌نته‌ری ڕاهێنانی په‌روه‌رده‌یی بۆ منداڵانی خاوه‌ن پێداویستی تایبه‌ت له سلێمانی.
یاداشته‌كه له لایه‌ن هه‌ریه‌كه له به‌ڕێزان م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی و نوعمان عه‌بدوڕه‌حمان، له ڕێكخراوی منداڵپارێزی كوردستان واژۆكرا.
له‌و مه‌راسیمه‌دا كه به‌ڕێزان ئاشتی ئیبراهیم و ئه‌ڵوه‌ن عه‌بدولغه‌فوور، یاریده‌ده‌رانی به‌ڕێوه‌به‌ری گشتی و ژماره‌یه‌ك له به‌رپرسانی هه‌ردوولا ئاماده‌ی بوون، به‌ڕێز به‌ڕێوه‌به‌ری گشتی وته‌یه‌كی پێشكه‌شكردو له وته‌كه‌یدا جه‌ختی له ئاماده‌یی به‌ڕێوه‌به‌رایه‌تی گشتی كرده‌وه له‌سه‌ر هه‌ماهه‌نگی و هاوكاری سه‌رجه‌م ئه‌و ڕێكخراوانه‌ی له بواری پاراستن و ڕاهێنانی منداڵان و منداڵانی خاوه‌ن پێداویستی تایبه‌تدا كارده‌كه‌ن، هه‌روه‌ك جه‌ختی كرده‌وه كه لێكتێگه‌یشتنه‌كه له پێناو خزمه‌تكردنی منداڵانی خاوه‌ن پێداویستی تایبه‌ته به‌جۆرێك پشتیوان ده‌بێت له به‌رده‌وامی پڕۆژه‌یه‌ك كه ماوه‌ی زیاتر له پێنج ساڵه حزمه‌ت ده‌كات و له ماوه‌ی ئه‌و پێنج ساڵه‌دا خزمه‌تی به ده‌یان منداڵ گه‌یاندووه، له داهاتووشدا بۆ پێنج ساڵی تر پڕۆژه‌كه به‌رده‌وام ده‌بێت و یه‌كێك ده‌بێت له‌و ناوه‌ندانه‌ی كه جێده‌ستیان دیاره له خزمه‌تكردنی منداڵانی خاوه‌ن پێداویستی تایبه‌ت، به‌تایبه‌ت منداڵانی ئۆتیزم و داون و هێندێك جۆری شه‌له‌ل ده‌ماخ.
سه‌نته‌ری ڕاهێنانی په‌روه‌رده‌یی بۆ منداڵانی خاوه‌ن پێداویستی تایبه‌ت ده‌كه‌وێته گه‌ڕه‌كی ڕاپه‌ڕینه‌وه‌و به ستافێكی شاره‌زاوه خزمه‌ت به منداڵانی خاوه‌ن پێداویستی تایبه‌ت ده‌كات.
|