وەزیری كارو كاروباری كۆمه‌ڵایه‌تی، ماڵی داڵده‌دانی ژنانی هه‌ڕه‌شه‌لێكراوی سلێمانی به‌سه‌رده‌كاته‌وه
به‌مه‌به‌ستی له نزیكه‌وه ئاگاداربوون له ڕه‌وشی ژیانی سودمه‌ندان‌و گرفته‌كانی ماڵی داڵده‌دانی ژنانی هه‌ڕه‌شه‌لێكراوی سلێمانی، به‌ڕێز وه‌زیری كارو كاروباری كۆمه‌ڵایه‌تی به وه‌كاله‌ت، سه‌ردانی ئه‌و ماڵه‌ی كرد.
ڕۆژی پێنجشه‌ممه، 5ی 7ی 2018، به‌ڕێز د.ڕێكه‌وت ڕه‌شید، وه‌زیری ته‌ندروستی‌‌و وه‌زیری كارو كاروباری كۆمه‌ڵایه‌تی به وه‌كاله‌ت، به هاوڕێیه‌تی به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی‌‌و به‌رێز عه‌مید سه‌ركه‌وت عومه‌ر، به‌رێوه‌به‌ری به‌ره‌نگاربوونه‌وه‌ی توندوتیژی خێزانی سلێمانی سه‌ردانی ماڵی داڵده‌دانی ژنانی هه‌ڕه‌شه‌لێكراوی سلێمانی كردو له نزیكه‌وه ئاگاداری ڕه‌وشی ژیانی سودمه‌ندان‌و گرفت‌و كێشه‌كانیان بوو، هه‌روه‌ها له دانیشتنێكی تایبه‌تدا گوێی له كێشه‌و گرفته‌كانی ستافی ماڵی داڵده‌دان گرت له كاتی ڕاپه‌ڕاندنی ئه‌ركه‌كانیاندا.
ئه‌و سه‌ردانه‌ی به‌رێز وه‌زیری كارو كاروباری كۆمه‌ڵایه‌تی به وه‌كاله‌ت وابه‌دوای ڕووداوه نه‌خوازراوه‌كه‌ی ڕۆژی 24ی 6ی 2018 هات، مه‌به‌سته‌كه‌ش له نزیكه‌وه ئاگاداربوون بوو له گرفته‌كانی ماڵی داڵده‌دان.
له ده‌ستپێكی سه‌ردانه‌كه‌یدا به‌ڕێز به‌ڕێوه‌به‌ری گشتی سه‌ره‌تا به‌ناوی به‌رپرس‌و ستافه‌كانی به‌ڕێوه‌به‌رایه‌تی گشتی‌‌و به‌رپرس‌و كارمه‌ندانی ماڵی داڵده‌دانی ژنانی هه‌ڕه‌شه‌لێكراوی سلێمانیه‌وه وته‌یه‌كی پێشكه‌شكردو تیایدا وێڕای سوپاسی سه‌ردانه‌كه‌ی جه‌نابی وه‌زیری كار به وه‌كاله‌ت، ڕووداوه‌كه‌ی ڕۆژی 24ی 6و گیان له‌ده‌ستدانی سودمه‌ندێكی ماڵی داڵده‌دانی به پرسه‌و خه‌مێكی گه‌وره زانی بۆ هه‌موو كارمه‌ندان، هه‌ر له وته‌كه‌یدا به‌ڕێ. به‌ڕێوه‌به‌ری گشتی هه‌وڵ‌و ماندووبوون‌و دڵسۆزی به‌رپرس‌و توێژه‌رو كارمه‌ندانی ماڵی داڵده‌دانی ڕوونكرده‌وه كه سه‌ره‌ڕای قه‌یرانی دارایی‌‌و گیروگرفته جۆراوجۆره‌كان به هاوكاری به‌رپرسانی به‌ڕێوه‌به‌رایه‌تی گشتی توانیویانه خزمه‌تێكی باش پێشكه‌ش به سودمه‌ندانی ماڵی داڵده‌دان بكه‌ن.
له سه‌ردانه‌كه‌یدا به‌ڕێز وه‌زیری كارو كاروباری كۆمه‌ڵایه‌تی به‌شه‌كان‌و شوێنی ژیانی سودمه‌ندانی ماڵی داڵده‌دانی به‌سه‌ركرده‌وه‌و پاش گوێگرتن له سودمه‌ندان‌و ستافه‌كانی ماڵی داڵده‌دان به‌ڵێنیدا به دواداچوون بۆ كێشه‌كان بكات‌و هه‌وڵ‌و توانای خۆی بخاته‌گه‌ڕ بۆ چاره‌سه‌ركردنیان به‌رزتركردنه‌وه‌ی ئاست‌و توانای ماڵی داڵده‌دان كه كارێكی پیرۆز ئه‌نجامده‌ده‌ن‌و شه‌وو ڕۆژیان خستووه‌ته سه‌ر یه‌ك بۆ چاره‌سه‌ركردنی گیروگرفتی ئه‌و ژن‌و كچانه‌ی به‌هۆی دۆخی كۆمه‌لایه‌تی كۆمه‌ڵگه‌وه ڕووبه‌ڕووی هه‌ڕه‌شه ده‌بنه‌وه.