كۆنفرانسی ده‌وڵه‌تسازی، داڕشتنه‌وه‌ی په‌یكه‌ری حكومڕانی له هه‌رێمی كوردستان به‌ڕێوه‌چوو
به به‌شداری ژماره‌یه‌ك له وه‌زیره‌كان‌و پارێزگاری هه‌رچوار پارێزگاكه‌ی هه‌رێم‌و ژماره‌یه‌ك له به‌ڕێوه‌به‌ری گشتی‌‌و قائمقام‌و به‌ڕێوه‌به‌ری ناحیه، ئینستیتیوتی ڕۆژھەڵاتی ناوەڕاست بۆ توێژینەوە ( MERI) ڕۆژی چوارشه‌ممه، 27ی 6ی 2018 له هۆتێل ڕیكسۆس له شاری دهۆك، كۆنفرانسی (ده‌وڵه‌تسازی، داڕشتنه‌وه‌ی په‌یكه‌ری حكومڕانی له هه‌رێمی كوردستان) به‌ڕێوه‌برد.
كۆنفرانسه‌كه له سه‌عات 9ی سه‌رله‌به‌یانی ڕۆژی چوارشه‌ممه، 27ی 6ی 2018 تا (5.30) ی ئێواره‌ی هه‌مان ڕۆژ به‌رده‌وام بوو و تیایدا پێنج پانێل له بواره جیاجیاكانی سیستم‌و به‌ڕێوه‌بردن له هه‌رێمی كوردستان به‌ڕێوه‌چوون، سه‌رجه‌م به‌شداربوان به بایه‌خه‌وه به‌شداری كۆنرانفرانسه‌كه‌یان كردو گفتوگۆی ڕه‌شنوسی پڕۆژه‌ی ئاماده‌كراوی ڕێكخراوی مێریان كرد بۆ چاكسازی له په‌یكه‌ری حكومڕانی له هه‌رێمی كوردستاندا.
ته‌وه‌ره سه‌ره‌كییه‌كانی كۆنفرانسه‌كه جه‌خت ده‌كاته‌وه له گۆرینی شێوازی به‌ڕێوه‌بردن‌و بچووككردنه‌وه‌ی په‌یكه‌ری حكومڕانی حكومه‌تی هه‌رێمی كوردستان‌و به سه‌نته‌ركردنی هاووڵاتی‌‌و په‌یره‌ویركردن له سیستمی لامه‌ركه‌زی‌‌و دامه‌زراندنی دامه‌زراوه‌كان‌و بایه‌خدان به ته‌كنه‌لۆجیای نوێ بۆ ئه‌وه‌ی به‌رزكردنه‌وه‌ی توانای دامه‌زراوه‌كان له گه‌یاندنی خزمه‌تگوزارییه‌كان.
به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له‌پارێزگای سلێمانی ئاماده‌بوو كه تیایدا به‌شدارێكی كارای كۆنفرانسه‌كه بوو وه‌ك به‌شێك له تیمی به‌شداربووی حكومه‌تی خۆجێی سلێمانی.
|