به‌ڕێوه‌به‌رایه‌تی گشتی به ڕاگه‌یاندنی ئاشكراو كێبركێ ژماره‌یه‌ك پۆست پڕ ده‌كاته‌وه
به پێی نووسراوی ژماره (1106)ی ڕۆژی 23ی 4ی 2018، كه واژۆی به‌ڕێوه‌به‌ری گشتی له‌سه‌ره، به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌لایه‌تی له پارێزگای سلێمانی بۆ پڕكردنه‌وه‌ی پۆسته به‌تاڵه‌كان به‌هۆی ئاڵوگۆڕ یان خانه‌نشین بوونه‌وه دوو لیژنه‌ی پێكهێناوه تا له ڕێگه‌ی ڕاگه‌یاندن‌و پڕكردنه‌وه‌ی (c.v)ی ڕه‌خساندنی هه‌لی چون یه‌كه‌وه پۆسته‌كان به كارمه‌ندانی سنوری به‌ڕێوه‌به‌رایه‌تی گشتی پڕ بكاته‌وه.
نووسراوه‌كه پاش كۆبوونه‌وه‌ی ژماره (4)ی ڕۆژی 17ی 4ی 2018 ی ئه‌نجومه‌نی به‌ڕێوه‌به‌رایه‌تی گشتی ده‌رچووه‌و تیایدا هاتووه:" پاڵپشت به‌و ده‌سه‌ڵاته‌ی پێماندراوه به‌مه‌به‌ستی پڕكردنه‌وه‌ی پۆسته به‌تاڵه‌كانی دیوانی به‌ڕێوه‌به‌رایه‌تی گشتیمان‌و فه‌رمانگه‌كانی‌ی سنوری ده‌سه‌ڵاتمان له ئاینده‌دا به پێی (c.v)و پێشبڕكێ‌‌و ڕه‌خساندنی هه‌لی یه‌كسان له‌به‌رده‌م هه‌موو ئه‌و كه‌سانه‌ی شیاوو گونجاون‌و ئه‌هلیه‌تیان له‌باره بۆ پڕكردنه‌وه‌ی ئه‌و پۆستانه بڕیارماندا به پێكهێنانی دوو لیژنه‌ی پێنج كه‌سی بۆ سه‌رپه‌رشتیكردنی پرۆسه‌ی پڕكردنه‌وه‌ی پۆسته به‌تاڵه‌كان له ده‌ستنیشانكردنی مه‌رج‌و تایبه‌تمه‌ندی هه‌ر پۆستێك‌و پاشان ڕاگه‌یاندن‌و پاشان چاوپێكه‌وتن ئه‌گه‌ر پێویستی كرد" ئه‌وه‌ش له چوارچێوه‌ی یاساو ڕێسا كارپێكراوه‌كان‌و بنه‌ماكانی به‌ڕێوه‌بردن.
هه‌روه‌ها له خاڵی 10ی به‌شی دووه‌می كۆنووسی ژماره (4)دا هاتووه :" كۆبوونه‌وه‌كه بڕیاریدا پڕكردنه‌وه‌ی هه‌ر پۆستێك كه ده‌رماڵه‌ی هه‌بێت له سنوری كاری به‌ڕێوه‌به‌رایه‌تی گشتی به شێوه‌ی ڕاگه‌یاندن‌و دروستكردنی كێبڕكێ‌‌و پێشكه‌شكردنی (c.v)و ڕه‌خساندنی هه‌لی چونیه‌ك‌و به‌دیهێنانی بنه‌مای (كه‌سی شیاو بۆ شوێنی شیاو)ه‌وه ده‌بێت".
جێی ئاماژه‌یه له چه‌ند ڕۆژی داهاتوودا ژماره‌یه‌ك پۆستی به‌تاڵ ڕاده‌گه‌یه‌نرێت بۆ پڕكردنه‌وه كه له ئێسته‌دا چۆڵن یان له ئاینده‌یه‌كی نزیكدا خاڵی ده‌بن، پۆسته‌كانیش له به‌ڕێوه‌به‌ره‌وه تێیدایه‌تی تا به‌رپرسی به‌ش‌و به‌رپرسی هۆبه له یه‌كه خزمه‌تگوزارییه جۆراوجۆره‌كان.
جێی وه‌بیرهێنانه‌وه‌یه له ماوه‌ی ڕابردووشدا بۆ چه‌ند جارێك پۆسته‌كان به‌ڕێگه‌ی ڕاگه‌یاندن‌و ڕه‌خساندنی هه‌لی یه‌كسانه‌وه له سنوری كاری به‌ڕێوه‌به‌رایه‌تی گشتی پڕكراونه‌ته‌وه.